Pemujur Sadia-Krian ari sukung semua

KRIAN, Saratok: Sukung tegut ari semua mai raban Serakup Dayak Iban Sarawak (Sadia) Krian ransing agi bejalaika pangku pengawa pulaika pemaik semua.

Ku Chairman iya, Andrew Paul, pemanah budi Opis Pengerai Pelilih Saratok ke udah setuju meri rumah Klinik Pengerai Kaki Wong ngagai serakup nya deka semampai dikenang.

“Terima kasih besai ke pementas piak bekaul ti udah nangkup peminta kami bejalaika pemansang komuniti ditu.

“Udah tu, kami nguji enggau naka ulih ngadu sereta ngubah rumah (klinik) tu ngambika ulih dikena bejalaika pengawa ti patut,” ku Andrew lebuh dirandau Suara Sarawak.

Sebedau tu ku iya, sida mar deka ngatur pengawa nadai palan ti chukup besai nangkup pemayuh tubuh kaban serakup nya.

MERI PERANSANG… Andrew ngenataika licha ba mua bala penyereta Program Sadia-Apan ba SMK Saratok.

Iya madah, sida ngelama tu ngandalka rumah ke didiri ba atas bukit enda jauh ari Balai St Jerome, Kaki Wong ditu endur ngatur program kelebih agi program pemansang pelajar dikumbai Program Sadia-Apan.

“Kami diatu berasai lantang endar laban udah diberi peluang ngena rumah klinik tu nyadika palan ngatur pengawa.

“Rumah klinik tu ila deka diseleti dulu ni bagi ke patut nyengkaum berundingka penyikap perengka guna pemun baka ai sereta meresa sambung tali karan ke bisi.

“Kebuah pia laban kitai bela nemu rumah klinik udah lama diteju lalu engka sekeda sambung tali karan udah retai ketegal udah kelalu lama tauka diketup chit.

“Kami sebuat udah besemaya deka ngintu enggau nyaga rumah klinik tu sereta ngena manah ungkup pengelantang semua,” ku iya nerang.

PEMAKAI MENUA… Andrew (dua kanan) meri sukung ngagai dagang pemakai asal kitai Dayak.

Ngelansa pasal pejalai Program Sadia-Apan ku iya, entara pengawa pemadu mar ditapi iya nya mai apai indai datai ngulu pengawa ngaul pelajar bala anak sida.

Program Sadia-Apan tu nyadi fokus sida laban ku penemu Andrew, pelajar nyadika kunchi pemujur enggau ngelepaska peranak menua pesisir ari perekuh penyeranta.

Nya alai sida ngasaika apai indai ke enggai kiruhka pelajar bala anak nyadika penekul nyapai juluk nya.

“Pekara baka tu balat ngasuh kitai irau laban apin mayuh apai indai sedarka pemesai guna pelajar enggau peransang sida ngagai bala anak.

“Nya kebuah kami sebuat keran amat ngatur program baka Sadia-Apan dikena matak apai indai nemu tanggungpengawa enggau pangku pengawa sida empu,” ku Andrew madah nyemetak.

Nya alai ku iya, tebal agi Program Sadia-Apan ke udah diatur ngelama tu endang nyelinting bala nembiak ke diau enggau besekula di menua pesisir nyengkaum apai indai sida.

Pengudah beberapa renggat program ke diatur, tebal agi timbal diterima ari apai indai enggau bala penyereta majak manah lalu mayuh sida tebuka runding nerima ubah enggau kuing pelajar kemaya hari.

Naka diatu ku Andrew, sida udah ngaul kerejasama enggau piak Sarawak Energy Berhad ngemujurka pejalai Program Sadia Apan: Sedarka Pelajar enggau Belajar Pintar.

“Kami mega bejalaika inisiatif ngiga belanja dikena nampung pejalai program dikumbai Komiti Servis Nengah Pemakai ke alai kami bisi bejualka dagin jani menua ti udah ditungkus nitihka standard makit menua tu.

“Produk dagin jani tu bisi dijual ba Rumah Asap Dayak Kota Semarahan ditu ninting minggu berengkah ari Hari Lima ngagai Hari Minggu lalu enti timbal manah diterima sereta bisi peminta dudi hari, kami deka nambahka hari bejual,” terang Andrew.

Ba lansa bukai, Andrew meri pengaga ati ngagai Tawan ke udahsetuju nyadi Penyanding Penemu Sadia-Krian, siku kaban lama kenyau ari 32 taun ke udah.

KELAI SUKUNG… Andrew (tiga kanan) disempulang bala bukai begambar ba mua rumah Klinik Kaki Wong.