Pemujur Viviana berekat peransang ‘kumang’

Berekat peransang ari indai iya ke mega suah menang pekit kumang ngujungka Viviana Lin teulihka pemujur nempa nama Malaysia pegari ba rengat antarabansa.

Viviana Lin, 19 taun asal ari menua ke tebilang enggau pangka benak iya nya Sri Aman, ngepun ke pengawa diri enggau pekit pemajik iya berumur 11 taun.

“Indai aku suah menang ba mayuh pekit kumang, nya mih nyadi peransang aku sama ngemaju ke diri sereta ngajar aku pasal dunya pekit tu.”

“Aku terubah enggau pekit baka tu suba ari tikas pemadu mit iya nya ari pekit ba rumah panjai, udah nya ngalih ngagai pelilih, nengeri nyentuk baka ke dipeda kita diatu,” ku Viviana.

Viviana madahka indai iya siku ari orang ti chakah enggau pekit pemajik dataika iya empu murih indai iya.

NGEMEGAH…Pemujur Viviana ngemegah bansa enggau menua.

“Sigi ari mit Viviana endang rinduka pengawa tu, suah ngena jumpung ke kala diulih aku sereta nitih chara orang bejalai ba panggau mandangka fesyen.”

“Aku empu rindu ngias iya ngena gari sereta penganta ari iya agi mit, lalu nyentukka diatu Viviana udah 17 kali bulih top 2 pekit pemajik,” ku indai Viviana.

Lebuh dirandau pasal kaul iya enggau Miss PLanet International 2019, Viviana madah iya dirandau National Director Miss Planet International 2019 Abdul Nazri Abdullah laban iya udah lama enggau pekit tu.

“Iya nanya aku enti sema aku bisi runding deka enggau pekit nya, tang aku madah aku patut nanya indai aku dulu laban iya ti ngiring aku sekumbang pejalai aku ba pengawa tu.”

“Lebuh indai aku meransang aku enggau pekit tu, udah nya baru aku neruska perambu ka ke Kemboja,” terang Viviana.

LUMUR TIGA… Miss Planet International 2019

Taja pia, Viviana madah diri ngagai Filipina sebedau iya neruska perambu enggau bepekit ba Kemboja laban Filipina siti menua ti bisi nyendiaka latih pekit pemajik antarabansa.

Nusi pasal peneleba iya ba din ari 18 Februari nyentukka 5 Mac, Viviana madah nya peneleba ti pemadu rindu diasaika iya laban ulih bepekit enggau 34 iku agi pemekit ari menua lain.

“Lebuh ba din, kami dilatih chara nyikap disiplin diri empu sereta belajar chara ngaul pangan diri enggau manah laban nya mega deka dikira dalam poin kami sesiku.”

“Kami ukai semina ngereja pengawa fesyen tauka pemajik diri, tang mega bisi pengawa volunteer ba sepital, rumah nembiak mit, rumah pengandai tuai, sekula-sekula, nanam pun kayu, bejalai ngagai kuil sereta belajar pasal budaya sida ba din,” ku Vivian.

Lebuh maya mandangka penau diri, Viviana madahka iya mantaika tanda tradisional Iban, iya nya ngajat.

BELA BAJIK…Viviana (kanan) begambar kenang enggau penyereta Miss Planet International 2019 ari menua bukai.

“Lebuh aku mandangka tanda nya, sida pemekit ari menua lain madah nya keterubah iya sida meda tanda menua kitai.”

“Bisi mega pemekit ari menua lain baka Mexico enggau South Africa madahka diri bisi minat deka belajar pasal budaya ba menua kitai,” tambah Viviana.

Pemujur ke diulih iya ba pekit tu diperansang ari dua iku kumang ti kala enggau pekit pemajik ngarika menua Malaysia iya nya Dewi Liana Seriestha, Miss World Malaysia 2014 enggau Larissa Ping, Miss World Malaysia 2018.

“Aku empu enda kala terundingka diri empu ulih nyapai pemujur baka ke dipeda orang diatu laban suah aku meda bansa China enggau India ti bisi enggau pekit pemajik rengat entarabansa.”

“Nyadi anak Iban ari menua Sarawak ti keterubah mai nama bansa enggau nengeri ngagai rengat antarabansa tu siti ari utai ti ngemegah,” ku Viviana madah enggau gaga.

Viviana enggau indai iya madah seduai chukup temegah ati enti sema mujur bulih Top 16.

“Pengelebih aku enti dibanding enggau pemekit ke bukai, nyangka laban aku udah suah dilatih baka tu ari mit.”

“Kira nya nyadi pengelebih ba aku, laban aku enda takut bejalai ba mua orang, berandau enggau orang, ngaul diri empu enggau orang bukai sereta suah besedia enggau pengawa ke diberi sida,” ku Vivian nambah.

Pemar napi pekit Entarabansa

Ku Vivian, bepekit ba rengat antarabansa tu bisi pemar ngagai iya empu.

“Pemar diasai kami din iya nya ari sukut masa lebih agi lebuh kami nukar gari laban chukup enda lama timpuh diberi dikena kami nukar gari,”

“Kelimpah ari nya, pemar ke diasai aku empu iya nya lebuh ngena gari tradisional Kemboja laban pemerat gari nya datai 30 kilogram,” ku Viviana.

Dirandau pasal perambu iya dudi ari, Viviana madahka diri semina deka fokus ngagai pengawa fesyen aja.

Viviana mega nangkan bala nembiak ti deka enggau pekit pemajik, anang takut mansutka belanja.

“Ngagai apai indai ti bisi ati deka ngasuh anak sida enggau pekit bakatu patut ngelatih anak sida ari mit, anang takut mansutka belanja, sereta patut ngepun enggau pengawa bepekit pemajik ari rengat pemadu mit baka ba menua diri empu.”

Nangkanka nya, Vivian madahka ungkus belanja iya enggau Miss Planet International 2019 tu makai RM 50,000.

Lebuh agi mit, Viviana madahka diri chukup rinduka main hoki enggau lumba padang. Tang pengudah iya enggau pekit pemajik tu, indai iya nagang iya enggau pengawa kumba main.

“Kebuah pia laban indai aku irau enggai ke aku chelum tauka telih lebuh bemain”

“Kala sekali aku keluar bepekit sukan enda madahka iya. Pulai ke rumah, dia aku alu kena anu tajapan menang dalam main nya,” ku Vivian lebuh nusi pengawa diri lebuh agi sekula suba.

Ditanya pasal chara nyaga pemajik diri empu, Viviana madahka diri enda mayuh utai ulih dikunsi.

Aku semina ngirup ai empat ngagai lima gelas sehari, nyaga mua ari produk nyaga kulit sereta suah sesais baka zumba enggau jogging.”

Chukup rinduka artis Bollywood, Viviana chukup gaga lebuh dirandau pasal artis Bollywood dikerinduka iya.

“Entara artis Bollywood dikerindu aku iya nya Aiswarya Rai, Kareena Kapoor, Sushmita Sen enggau mayuh agi laban sida tu mayuh enggau pekit pemajik rengat dunya.”

“Pemujur aku baka ke dipeda orang mayuh sehari tu, semua nya datai ari indai aku ti mayuh meri peransang ngagai aku pemanjai aku enggau pengawa pekit pemajik tu.”