Pemutus pasal isu minyak, gis ditemu ujung taun tu

“Ba bulan Oktober tauka ujung taun tu, semua randau bekaul enggau MA63 deka disimpul.”

KUCHING: Pemutus runding bekaul isu minyak enggau gis di Sarawak dipelaba deka dibantai ba ujung taun tu.

Menteri Muda ba Opis Kepala Menteri (Undang-Undang, Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali madah runding bekaul enggau Sempekat Malaysia (MA63) agi bejalai baka selama lalu aum Komiti Pemandu MA63 begulai enggau Kepala Menteri Datuk Patinggi Abang Johari Tun Openg sereta Menteri Besai Tun Dr Mahathir Mohamad bekaul isu minyak enggau gis terus dipejalai dalam kandang setaun tu.

“Ba bulan Oktober tauka ujung taun tu, semua randau bekaul enggau MA63 deka disimpul.

“Kami deka meri timpuh, nyangka naka ujung taun tu,” ku iya.

Hasidah madah munyi nya lebuh dirandau raban pemberita pengudah Program Ibadah Qurban beserimbai Hari Raya Aidil Adha 2019 (1440 Hijrah), di Palan Servis Adun Samariang ditu, kemari.

PEMUTUS UJUNG TAUN TU… Hasidah benung nerang pasal isu minyak enggau gis ngagai pemberita, kemari.

Nangkan nya ku iya, sebedau tu, runding bekaul enggau pekara nya dipejalai nengah Opis Menteri Pekara Pengatur Ekonomi.

“Taja pia, rambau aum ke udah lalu begulai enggau Komiti Pemandu, iya (Tun Mahathir) madahka iya empu deka sama ngambi bagi pasal isu tu.

“Nya alai, iya empu deka berunding terus enggau Kepala Menteri Sarawak enggau Sabah,” ku iya.

Ku Hasidah, nama-nama aja pemutus ti pansut ari pengawa berunding nya, pekara nya deka dibai ngagai Komiti Pemandu lalu kitai deka nganti ngagai bulan Oktober tauka ujung taun tu.

Kelimpah ari nya, Hasidah madahka pengawa berunding nya ukai semina nyengkaum royalti minyak enggau gis 20 peratus, tang nyengkaum chukai lima peratus ngagai produk eksport petroleum mata.

“Kami chukup fokus ngagai chukai lima peratus tu laban nya endang hak kitai nitihka konstitusyen (undang-undang menua).

“Kami mega deka beratika undang-undang baka Oil Mining Ordinance (OMO) dipejalaika sereta mayuh agi bengkah pekara ti agi mengkang dalam runding kami,”ku iya madah enggau nyemetak.

Hasidah madahka pekara nya endang deka nganti lama laban mayuh pekara ti deka diperatika tang ba pengujung iya ila, kami deka kededua piak bulih penguntung ari pekara nya.

Berebak enggau nya, lebuh dirandau enti sema Perintah Sarawak bisi minta Perintah Besai mulaika asil untung baka digaga Perintah Sabah ti minta pulai 40 peratus asil untung menua sida, Hasidah madahka nadai pekara ti baka nya nyadi ngagai Sarawak.

“Kitai nadai minta pekara ti baka nya alai 40 peratus di Sabah nya pekara ti bebida, lalu nadai ba Sarawak.

“Baka dipadah aku tadi, kitai semina fokus ngagai chukai lima peratus produk eksport petroleum enggau OMO ti mantu kitai ngatur undang-undang bekaul minyak enggau gis,” ku iya.

Dua hari ti udah, Hasidah madah perintah Sarawak agi nganti pemutus Tun Dr Mahathir bekaul enggau haribulan aum Komiti Khas MA63 ti deka datai lalu maya nya deka dipadahka Tun Dr Mahathir empu.

Suara Sarawak