Pemutus Soon Koh dipebasa

“Singkang politik PSB engka enda setimbal lalu bisi nyimpang ari pejalai perintah kitai ke diatu” – Abang Johari.

KUCHING: Kitai patut bebasaka pemutus Datuk Seri Wong Soon Koh, ku Kepala Menteri Datuk Patinggi Abang Johari Tun Openg.

Abang Johari mansutka jaku tu lebuh nyaut tanya bekaul enggau pemutus Menteri Wang Kedua nyurutka diri ari kabinet nengeri kemari.

“Pemutus nya datai ari iya (Wong) empu lalu patut dipebasa.

“Aku pechaya, nyadi siku ari kaban ngembuan mayuh peneleba enggau penau ba dunya politik, iya patut nemu agi pangka ari pemutus nya.

“Bisi kebuah ti patut iya ngaga pemutus baka nya lalu semina iya aja nemu,” ku Abang Johari madah nyemetak.

Abang Johari dirandau pemberita pengudah bejadika Aum Besai Entarabansa Ke-11 Pasal Teknologi Pemadah di Asia (Cita 2019) ba sebuah hotel tebilang ditu pagi tadi.

Tambah mega ku iya, pejalai politik parti dipungkal Soon Koh empu, Parti Sarawak Bersatu (PSB), engka enda sejalai enggau perintah ke bisi diatu.

“Taja pia, enda ulih dikenggai Soon Koh udah mayuh nabur jasa ngagai rayat enggau menua tu.

“Iya ukai semina nyadi kaban kabinet aja tang mega bebendar ngemai peminta rayat ngagai Aum Kunsil Nengeri (Dun),” ku iya nampung.

Abang Johari dirandau pemberita pengudah bejadika Aum Besai Entarabansa Ke-11 Pasal Teknologi Pemadah di Asia (Cita 2019) ba sebuah hotel tebilang ditu pagi tadi