Penanggul bekal ai di Suai meseti diputar lengkas

KUCHING: Penanggul suntuk bekal ai beresi ke ditapi peranak sitak Suai lebih agi maya musim kemarau seruran nerima perati ari Adun Samalaju- PRS Majang Renggi.

Kenu ku iya, penanggul tu seruran disebut ninting aum Dun, nya alai dikearapka piak opis menteri bekaul lengkas mutarka penangul laban rayat deka meda projek nyambung bekal ai beresi ditu dipejalai enda lama agi.

“Chukup sinu ninga sebanak peranak ditu (Suai) lebih agi musim kemarau. Ai ujan ke ditimbun dikena sida beridup ninting hari jampat abis enti hari nadai ujan.

“Pia mega ai sungai ke dikearap sida nyau kamah ketegal pengawa ari kebun dandang besai sereta teda utai kamah ke dibuai peneka ati ari kilang kelapa sawit terus anyut ngagai Sungai Suai,” ku iya.

Iya madah munyi nya maya bejakuka mosyen meri basa nimbal Jaku TYT Sarawak Tun Abdul Taib maya Pengerami Bejadika Aum Dun Ke-18 Renggat Keempat ditu, kemari.

Berebak enggau nya, Majang madah urung 20 iku ketuai raban bansa ari sitak Suai bisi datai ditu mendingka Aum Dun laban deka nentuka pengari rayat sida mantaika isu ke meseti diputarka opis menteri ke bekaul.

Nangkan nya, Majang mega minta perintah bebendar agi ngerembaika bungkur arus penyambung nengah pengawa ngaga tiang komunikasyen enggau struktur sistem pemanchar telekomunisi ba Samalaju.

Tu beduduk ari penanggul servis jalur lebar ke ditapi peranak ditu. Taja sekeda udah ngasaika servis ti meruan tang agi bisi sekeda endur napi penanggul ketegal arus internet ti kelalu lubah.

“Penanggul tu balat ditapi peranak sitak Suai nyengkaum enam buah sekula primari, dua buah klinik perintah enggau lebih 600 buah rumah panjai sereta genturung pendiau,” ku iya.

Suara Sarawak