KUCHING: Penanggul parit alit ba Kampung Rampangi Fasa 1 enggau Kampung Rampangi Fasa 2 nerima perati ari Perintah Sarawak.

Menteri Muda ba Opis Kepala Menteri (Pekara Islam enggau DBKU) Datuk Dr Abdul Rahman Junaidi madah, sebagi ari sistem parti dua genturung pendiau nya bepenanggul ngujungka ai ngandang.

Ku Rahman, bisi sekeda endur udah dikemanah lalu parit mega udah disemin tang ai agi ngandang.

“Kitai udah ngelala sitak ti bepenanggul baka ba Lorong Cengal enggau Nyatuh (Kampung Rampangi Fasa 1) enggau Lorong Merbau (Kampung Rampangi Fasa 2),” ku iya lebuh ngabas endur nya, ditu tadi.

Dr Abdul Rahman ti mega Menteri Muda Utiliti (Bekal Ai) madah, Opis Parit enggau Entali Ai (DID) deka nyeleti parit alit tu enggau ngenalam anak sungai ngambi arus ai lanchar.

Nambahka nya ku iya, DBKU mega deka nyendiaka projek rayat ngaga parit semin beungkus RM2 juta dikena mutarka penusah bah tunggal dia.