Penanggul ukai ditapi PRS,SUPP kediri tang mungkur GPS

KAPIT: Penanggul politik ke bekaul enggau PRS baka ke udah diripot berapa hari tu ukai semina penanggul PRS tauka SUPP kediri tang mega mungkur GPS.

Kaban Kunsil Nengeri (ADUN) Pelagus, Wilson Nyabong Ijang madahka nama ke nyadi tu penanggul ari GPS ketegal orang luar benung ngambi penuduk enggau kaban ari GPS.

“Aku setuju enggau penemu ke udah dipadah ketuai menteri kitai penanggul tu endang ari peturun. Diatu GPS ukai agi BN tang siti parti ke baru ngembuan prinsip kediri empu,”

“Aku pechaya GPS ngiga jalai baka ni ka mutarka penanggul tu,”

“Aku pechaya enggau prinsip segulai sejalai iya nya enti siku udah negu entara ari kami reti iya udah negu semua,”ku iya

Wilson mega madahka Datuk Joseph Entulu Belaun enggau Datuk William Nyalau Badak udah dibuai ari PRS laban ke udah ngelaban rintai chalun ke udah dipadah parti tertinggi.

“Kebendar iya Entulu dibuai laban ke mantu piak penyakal ngelaban chalun PRS ba pengawa bepilih nengeri ke udah sereta aku enda berunding ni bagi parti politik ke ngemendar pengawa baka tu,”

“Entulu mega udah masuk parti PKR kenyau ari 13 Mei 2018 baka ke udah diripot surat kabar di menua tu sebaka enggau Datuk Sylvester Entri . Beduduk ari nya, Entulu ke udah nyereta PSB ukai penanggul ari PRS tang mih ari penanggul PKR,”ku iya

Kelimpah ari nya, iya sama penemu ngau jaku ke udah dipansutka presiden PRS iya nya Kaban Parlimen Sri Aman, Datuk Masir Kujat ulih tama ngagai dini parti ke deka iya.

“Masir udah madah ngagai semua orang iya udah badu megai pengawa ari PRS tang agi ngenanka penuduk iya ba Sri Aman ke empu PRS,”

“Diatu iya ngumbai sitak Sri Aman agi penuduk ke dipegai iya,tang aku deka ngingatka sapa bagi kala endur iya berutang ba pengawa bepilih apin lama ke udah patut ngiga iya terus ukai PRS,”ku iya.
ambis

Suara Sarawak