ARTIKEL

Penanyi Judson nunda singkang apai

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

BESERIMBAI enggau pengerami Hari Gawai ti majak ngansak sesemak enda lama agi, bemacham pekara udah disikap kitai dikena ngintu pengerami nya.

Baka nya mega ba sukut pemerindang, mayuh bala artis Dayak udah nyikap diri ngerikod enggau ngeluarka lagu Hari Gawai.

Nya alai, lebuh kitai mindah kin kia baka ba sebelah supermakit, palan bebeli barang enggau ti bukai, lagu Gawai udah berengkah diputar ba palan nya.

Ukai naka nya aja, lebuh kitai mendingka radio sekali ke nya ba rumah, opis tauka dalam entukar, bala DJ radio pen bela mutarka lagu Gawai nengah churung radio.

Nya nanda Hari Gawai majak ngansak sesemak lalu runding kitai pen udah ba rumah panjai taja tubuh agi ba mengeri tauka menua orang.

BEGAWAI BA TULAI
Siku penanyi sigat ari Bagi Menua Miri, Judson Madang bela enda tinggal ngerikod enggau ngeluarka lagu Gawai diri.

Lagu diberi nama Begawai Ba Menua Tulai nya mujur dipansutka ba pelasar YouTube Joseph & Christina Enterprise kena 12 Mei tu tadi.

Dalam timpuh seminggu aja, lagu nya dikerindu sereta mujur dipeda lebih 2,000 orang.

Lebuh bekenang senentang lagu nya, Judson madah, Tulai nya menua sepiak indai iya ba Bagi Menua Bintangor.

Iya madah, Gawai taun tu sida sebilik deka ngintu pengerami nya ba Tulai lalu taun dudi ba menua apai tunga Balingian, Mukah.

Taja pia ku iya, sida udah lama ngentapka diri ba Bagi Menua Miri.

LANDIK BELAGU…Pengelandik Judson ba pengawa belagu nunda singkang apai.

Nya alai, mensia mayuh kelebih agi bala peminat ti deka betemu enggau penanyi sigat nya, kita diperansang ngabang ngagai rumah iya ba Tulai.

Gawai tu meh peluang manah kitai begulai enggau pangan diri dikena negap pemanah kaul kelebih agi betemu enggau penanyi dikerindu.

“Baka orang bukai mega, aku gagit deka pulai ngintu Hari Gawai begulai enggau diri sebilik, bala petunggal, bakih enggau kaban belayan ba Tulai.

“Ila kitai betundi bebuti, berami lantang ati ngintu Hari Gawai begulai…ohhhh…haaa…,” ku iya.

PEJALAI MERINDANG
Penanyi beumur 21 taun ti ngembuan sada nyawa lunak didinga nya berengkah ngepun pejalai diri ba industri muzik Iban ba taun 2022 tu tadi.

Naka diatu, Judson mujur ngerikod enggau ngeluar dua lagu diri ti diberi nama Ngajat Ngelingi Ranyai enggau Begawai Ba Menua Tulai.

Siti agi lagu iya, Tua Nyadi Satu diatu benung ba renggat digaga lalu disadang deka dikeluar enda lama agi.

Taja pen agi baru nyingkang ba dunya pemerindang Dayak tang Judson ransing deka belajarka mayuh pekara bekaul pengawa merindang, ngalunka sada nyawa sereta ngeluar mayuh lagu diri.

Ukai semina landik belagu, Judson mega landik nengkebang leka lagu baka lagu Bujang Pemula ungkup penanyi bukai.

UNGKUP PEMINAT…Judson rambau ngaga video lagu Tua Nyadi Satu lalu lagu nya digaga khas ungkup peminat diri.

Ketegal ngembuan pengerindu besai ba pengawa belagu, iya suah masuk mayuh pekit belagu ti bisi diatur.

Nya nyengkaum Pekit Belagu Online ti diatur W&E, pekit belagu diatur penanyi tebilang, komposer enggau pemungkal Panggau Buluh Pengerindu (PBP), Embat Lala sereta mayuh agi pekit bukai.

Iya madah, pengerindu belagu nya dikembuan iya pengudah abis Pom Lima nyentuk diatu.

Kelimpah ari nya, pengerindu iya ba pengawa belagu nya endang diparit apai iya ti mega siku orang ti landik belagu enggau nebah kereban muzik baka keyboard, gita enggau ti bukai.

Lebuh dirandau senentang resia pemanah sada nyawa, Judson madahka diri nadai tentu bisi resia baka bala penanyi bukai.

“Taja pia, aku chukup ngemerat pengawa ngirup ai angat nyilu kuku sereta belelak enggau chukup.

MAJAK NGAUL PEMINAT
Bekaul juluk dudi hari, Judson madah, iya deka ngeluar mayuh agi lagu baru dudi hari dikena merindang bala peminat diri.

Nya dikena iya masa enggau beterima kasih ngagai bala peminat iya sereta deka merindang bala peminat diri ukai semina ba Miri aja tang selampur Sarawak.

Iya mega beterima kasih ngagai bala peminat, kaban belayan, bala bakih enggau sida sebilik ti seruran nyukung sereta besampika pejalai iya ba pengawa nya.

“Terima kasih ngagai sukung kita semua lalu begempung meh kitai nyagu enggau ngemansangka industri muzik kitai Dayak ngambi majak dikelala semua orang.

“Aku ngarap bala peminat liat ati ngati lagu baru ari aku iya nya Tua Nyadi Satu ti deka dikeluarka enda lama agi.

“Lagu tu dituju aku khas ngagai semua kita kelai terima kasih aku ngagai kita semua, terus meh nyukung pejalai aku ba dunya pemerindang.

“Pia mega, ngena peluang tu, aku deka meri Selamat Ngintu Hari Gawai ngagai semua bansa Dayak kelebih agi bala peminat, kaban belayan, bala bakih enggau kami sebilik,” ku iya.

Iya madah, industri muzik Dayak kemaya hari tu majak maju laban bala penanyi Dayak majak nambah baka kulat ti tumbuh pengudah ujan.

Semua artis Dayak nya ku iya, endang bepenau sereta mansutka lagu ti bekualiti seraris enggau ubah jeman kemaya hari bechuan neladan pengelala bansa diri.

Ungkup penerang, Judson ukai semina landik ba pengawa belagu tang siku penganta profesional sereta bisi bejalaika servis nganta.

Nya alai, mensia mayuh ti deka nguji keranjai jari tauka servis nganta artis Iban tu, kita diperansang ngiga iya ba lumur 013-4835493 tauka ngelawa Facebook M.U.A Judson M Miri.

BERITA LAIN

Tiga lelaki ditan

MUKAH: Tiga lelaki peranak menua beumur entara 24 nyentuk 26 taun ditan pengudah ditemu positif dadah bansa methamphetamine ba Operasyen Begulai Nagang Penyah t i

6.49 gram dadah dirampas

KUCHING: Bisi 14 individu ditan ba bemacham penyalah bekaul dadah ba Op Tapis Khas ti dipejalai pengelama tiga hari ngelingi pelilih tu, ari 25 nyentuk

BERITA TERBARU

RM1.272 bilion perkukuh bekalan air di Sarawak

KUCHING: Enam projek bekalan air di Sarawak bernilai keseluruhan RM1.272 bilion akan diteruskan menerusi Pelan Pelaksanaan Berkala Pertama Rancangan Malaysia Ke-13 (RMK13) bagi meningkatkan akses

Polis tahan empat suspek kes khianat simbah cat

MIRI: Gara-gara tuntutan hutang pinjaman wang dalam talian yang dipercayai dibuat oleh anak lelakinya, seorang bapa berusia 54 tahun menerima ugutan sebelum kediamannya di sebuah