SARATOK: Kaul manah enggau kerejasama rat entara pengari rayat enggau bemacham ejensi ba siti pelilih beguna amat dikena nyendia servis pemadu manah ungkup rayat.
Kaban Kunsil Nengeri (ADUN) Kalaka, Mohamad Duri madah, kerejasama ejensi ba renggat negeri tauka Perintah Besai beguna amat dikena merambu enggau bejalaika pemansang kelebih agi ba sitak Kalaka enggau pelilih Saratok.
Nya alai, iya ngarap kaul manah nya ulih ditampung dikena nyendia servis pemadu manah ungkup rayat.
“Semua kitai bela ngesan pangku pengawa diri empu.
“Dikena nyendia servis pemadu manah sereta bejalaika projek pemansang, kerejasama enggau semangat ti seruran nyukung pangan diri patut bisi ngambi penanggul enggau pemar ulih ditapi begulai.
“Munyi ku sempama, lempung sama nanggung, berat sama ngesan,” ku iya.
Mohamad Duri mansutka jaku nya pengudah betemu enggau Tuai Unit Nagang Penyalah enggau Pengelikun Komuniti, Indu Opis Polis Pelilih (IPD) Saratok, Inspektor Amran Nawawi sereta raban iya ditu, ensanus.
Ungkup Saratok, iya ngaku udah nerima kerejasama manah ari semua ejensi.
“Ambi ke chunto, IPD Saratok sereta Balai Bomba enggau Penyah Penusah (BBP) Saratok entara bakih strategik besai kitai ba pelilih tu.
“Baka nya mega ejensi bukai, semua sida udah bejalaika pangku pengawa besai ba pemansang enggau bejalaika bemacham projek ungkup rayat,” ku iya.
Ba pengawa betemu nya, pekara dikerandau nyengkaum sekeda kerejasama entara Palan Servis Komuniti ADUN Kalaka enggau IPD Saratok ti deka dipejalai sepanjai taun 2024 tu.
“Pekara dikemerat iya nya nentu pengelantang enggau pengelikun komuniti semampai dijaga, inisiatif nagang penyalah enggau ti bukai,” ku iya.
