Penemu dikunsi nyadika malin

Apoc 13 2019

KUCHING: Urung 10,000 pengusung nedat endur mandangka macham bansa enggau chura orkid naka kemari.

Datuk Bandar Dewan Bandaraya Kuching Utara Datuk Abang Abdul Wahap Abang Julai madahka sida nagit 60,000 pengusung datai ba Hari Minggu tu.

“Bisi 10,000 pengusung datai kitu naka sehari tu (kemari) meda enggau ngayam pemanah orkid seraya ngiri penemu baru pasal bungai nya.

“Nya kebuah kami andal amat tagit 60,000 pengusung ulih dijapai nyentuk Hari Minggu tu,” ku iya.

Abang Abdul Wahap mansutka jaku nya ba Pengerami Nutup Program Licha Aum Besai Orkid Asia Pasifik Ke-13 2019 (Apoc13) ba Palan Aum Borneo Kuching (BCCK) ditu, kemari.

Iya madahka diri berasai lantang ati beratika pemujur aum besai nya ti meri sanding penemu pasal industri, dagang, pengawa nyaga enggau ngintu pesaka sereta pekara bukai pasal orkid.

“Mayuh licha dikenatai chukup manah sereta narit ati lalu aku pechaya penemu dikunsi tu tau nyadika malin penemu pasal orkid.

“Terima kasih besai ngagai bala pengelicha ti udah bekunsika penemu ti meri pemaik ngagai industri orkid kelebih agi ekonomi dagang temuai menua,” ku iya.

Kelimpah ari nya, iya ngarapka bala temuai ari menua luar enda leju nemuai kitu tauka bagi menua bukai di Sarawak pengudah aum tu tembu.

Apoc13 sekali tu ngangauka 57 pengelicha bekunsika penemu pasal taxonomy tauka pelajar pasal bagi bansa utai idup nitihka gaya pengidup, Pansik enggau Pemansang (R&D).

Tu nyengkaum import tauka eksport, phytosanitary, Cites enggau nyaga utai tumbuh, pekara undang-undang, industri bansa bungai, cultivation tauka kereja ngeraduka tanah

lalu nanam utai enggau propagation, eko-dagang temuai sereta pekara pengelikun orkid.

Program diatur dua hari berunggu lalu udah 19 bengkah menua baka Singapore, Thailand, Vietnam, Indonesia, Jipun nyengkaum menua tu empu.

Apoc14 deka diatur di Singapore ditangkan Apoc15 di Taiwan.

Ba simpul jaku iya, Abang Abdul Wahab meri pengaga ati ngagai 43 bengkah ejensi enggau mensia mayuh ti udah ngemujurka semua pengawa sepanjai Apoc13 diatur.

MAYUH PENEMU BARU… Datuk Abang Abdul Wahap Abang Julai (tujuh kiba) begambar enggau bala pengelicha nyerumba Pengerami Nutup Apoc-13 2019 ba BCCK ditu, kemari. Gambar – NADIM BOKHARI.

Suara Sarawak