ARTIKEL

Pengajar Lindsay Puh ngajar nembiak menua ulu

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

SIKU pengajar ukai semina meri penemu ngagai nembiak tang beempu tanggungpengawa besai narak pemereti ati ngagai bala nembiak.

Ba sebuah pelilih mit, bisi sebuah sekula ti teguh bediri enggau jauh ari mengeri.

Ba sekula nya, bisi siku pengajar ti sanggup jauh ari diri sebilik laban pengingin ati ngajar nembiak.

Siku pengajar benama Lindsay Rogene, 32, digelar Pengajar Lindsay nya asal ari Kuching lalu ngajar di sekula Kapit.

Ku iya, taja jauh ari diri sebilik, enda ngelemi semangat iya terus ngajar ba pengawa dikerindu kenyau ari mit.

“Nyadi siku pengajar endang juluk ati aku kenyau ari mit lalu aku temegah laban mujur nyapai juluk ati.

“Aku bulih nyadi pengajar ba Sekula Sekondari (SMK) Kapit No. 2 maya beumur 31 taun lalu sekeda orang engka ngumbai nya laun.

“Tang ba aku, umur nya ukai nyadi penekul nyapai pemujur enggau juluk ati ti lama udah dikeingin aku ngelama tu,” terang iya.

PEJALAI LAPAN JAM

Jauh ari diri sebilik ukai pengawa muntang ba sekeda orang kelebih agi ninggal ke orang tuai.

Tang ari pengingin ati nyadi pengajar, iya sanggup nempuh pejalai beribu batu ari menua diri datai ba Kapit.

“Pejalai ari Kuching ngagai Kapit beguna ke timpuh lapan jam lalu tu enda nekul aku pulai maya ujung minggu ngabas diri sebilik ba menua.

“Taja bisi sekeda jalai alun benung digaga tang aku tetap ngering ke diri nujah jalai nya dikena mantup pengelengau ngagai diri sebilik.

“Aku suah pulai lemai Hari Lima lalu pulai baru ngagai Kapit pagi Hari Minggu nya.

“Chukup lelak mulai kediri ngagai Kapit tang aku enda mudah putus pengarap ngambi ulih ngajar bala nembiak,” terang iya.

Taja pia, pengajar ti ngajar nembiak Pom Enam nya endang naka ulih ngiri penemu ngagai bala nembiak taja napi mayuh tanggungpengawa.

Ninting hari, iya meseti nyendiaka kereban belajar ngambi pengawa nembiak belajar muntang agi.

PEMAR NYADI PENGAJAR

Kitai ti gawa ba menua ulu endang meseti nyikap diri napi bemacham penanggul enggau pekara enda disadang nyadi.

Pengajar Lindsay madahka diri napi penanggul ngiga kereban ngajar kelebih agi penerang ari Internet laban ba sitak iya pedis ngiga arus Internet.

“Aku nyuwa ba sebuah rumah ti bisi arus Internet tang enda deras nyentuk pedis ngiga kereban ngajar.

“Kadang aku deriba datai ba pasar ngiga arus Internet deras.

Kala mega deriba kediri maya malam hari laban aku beguna ke kereban ngajar dikena ngajar nembiak,” terang iya.

Taja napi pemar baka nya tang Pengajar Lindsay nadai kala berunding deka badu gawa tang peneleba enggau kenang nya ngajar iya majak nemu pemesai reti sabar.

Ku iya, penanggul nya meri kenang manis ngagai iya ulih napi bemacham pemar sereta temegah laban enda mudah mantul ati.

Naka diatu, Pengajar Lindsay nadai ati deka pindah ngagai pelilih ti maju agi laban iya rindu ngajar bala nembiak di Kapit.

Tambah mega, peranak ba Kapit chukup kemerah sereta iya ngasaika diri dibasa nyadi siku pengajar.

Ukai semina nya aja, iya suah nerima mayuh perais ari nembiak maya Hari Pengajar lalu apai indai nembiak mega suah nganjung pemakai.

Iya mega gawa sekumbang gawa di Kapit jarang amat bebelika lauk laban peranak dia chukup gerah jari bekunsi jereki.

Nya entara kebuah iya empai berunding deka mindah ngagai sekula tauka pelilih bukai.

PENGANDAL

Genap iku mensia udah tentu bisi pengandal ngagai bala nembiak nyengkaum pengajar bansa Bidayuh nya.

Beserimbai Hari Pengajar, iya ngarap bala nembiak bebendar nyapai pemujur dikena nyamin pengidup ti menyana.

Iya mega mesan sida ti baru nyadi pengajar anang mudah mantul ati taja napi bemacham penguji.

“Pesan tu nuju nembiak aku. Belajar bebendar laban kami ke nyadi pengajar tu naka ulih deka ke bala nembiak bulih bemacham penemu.

“Dudi hari enti sema kita nyadi pengajar, ajar meh bala nembiak enggau penuh penyabar laban kitai meseti sedar, sebedau mujur kitai kala ba tikas pemadu baru,” ku iya nyemetak. – ARIANA FIDELIA.

BERITA LAIN

Tiga lelaki ditan

MUKAH: Tiga lelaki peranak menua beumur entara 24 nyentuk 26 taun ditan pengudah ditemu positif dadah bansa methamphetamine ba Operasyen Begulai Nagang Penyah t i

6.49 gram dadah dirampas

KUCHING: Bisi 14 individu ditan ba bemacham penyalah bekaul dadah ba Op Tapis Khas ti dipejalai pengelama tiga hari ngelingi pelilih tu, ari 25 nyentuk

BERITA TERBARU

Gagal Bayar Denda RM10,000, Dua Individu Dipenjara

BAU: Dua individu dihantar ke Penjara Puncak Borneo selepas gagal membayar denda RM10,000 setiap seorang yang dijatuhkan oleh Mahkamah Bau atas kesalahan berkaitan transaksi kewangan,