KUCHING: Presiden Parti Sa’ati Rayat Sarawak (SUPP) Datuk Dr Sim Kui Hian nerima manah jaku tangkan dipansutka Kepala Polis Menua Datuk Seri Abdul Hamid Bado ti madah deka nangkap tekala nya kaban politik ngangkaika isu raban bansa di Malaysia.
Menteri Kaunsil Kandang Menua enggau Pengawa Berumah nya madahka isu raban bansa endang enda diterima di Sarawak tang jaku tangkan endang patut ditibarka piak bekuasa.
“Raban ekstremis pengarap ti tau ngasuh charut enggau pambar endang enda kala diterima di menua tu kenyau ari suba, diatu dataika jemah.
“Tu ukai ari penemu aku kediri tang semua rayat Sarawak ngasaika pekara ti sama,” ku iya.
Pia mega ku Kui Hian, pengarap patut mai orang begempung enggau diau lantang lalu ukai baka di Semenanjung Malaysia ti bisi raban ekstremis dataika sida charut.
Iya mansutka jaku nya lebuh dirandau Suara Sarawak ba pengawa ngintu pengerami Kuil Chung Fak Tang di Taman Kenyalang tadi.
Berebak enggau nya, sepenyampau 30 iku ari ruang bilik seran enggau Orang Nyelai Pendiau (OKU) datai ari pupu bansa udah nerima bantu.
Entara bantu disua baka berau, gula, mi, minyak makai, telu enggau ke bukai dikena sida beridup.
“Kitai temegah ati nyadi rayat Sarawak laban seruran bebasa sereta betulung pangan diri nadai ngira bansa enggau pengarap,” ku iya madah nyemetak.
