PANTU: Perambu ngaga siti sekula sekondari ti baru dikena nangkup guna pelajar nembiak di pelilih Pantu dudi hari benung ba renggat perambu begulai enggau raban bekaul.
Kaban Parlimen Sri Aman, Datuk Seri Doris Sophia Brodie madah, iya bisi mantai perambu nya ba aum Parlimen lalu diatu benung diperambu begulai enggau raban bekaul.
“Perambu ngaga sekula tu bisi dikerandau begulai Opis Pelilih Pantu enggau tuai komuniti lokal ba siti aum di Bilik Aum Opis Pelilih Pantu empai lama.
“Taja pen pengawa ngaga sekula tu engka enda ulih dipejalai ba timpuh ti semak tang perambu ngaga sekula tu udah digaga lalu pengawa ngamat perambu tu deka ditampung,” ku iya.
Doris bejaku munyi nya rambau bejadi Aum Besai Ninting Taun Gerempung Apai Indai enggau Pengajar (PIBG) Sekula Primari (SK) Pantu 2026 ditu, sehari tu.
Ba lansa sebaka, iya nyemetak madah, kerejasama rat entara raban sekula, apai indai enggau komuniti beguna amat nentuka pemujur sistem pelajar kelebih agi ba renggat baruh.
“Sukung betampung ari apai indai nengah pelasar PIBG ulih mantu raban sekula bejalaika mayuh inisiatif dikena nambah penyulut akademik nembiak.
“Inisiatif tu nempa personaliti ti sebela enggau ulih besemekih,” terang iya.
Tampung iya, PIBG ngesan pangku pengawa besai nyadi jematan ti nyambung raban sekula enggau apai indai.
“Nengah kerejasama rat, kitai ulih nentuka genap nembiak nerima sukung pemadu manah dikena nyapai penyulut ba pelajar,” ku iya.
