MIRI: Opis Pengerai Malaysia (KKM) udah nyikap diri betati ke sekeda perambu bekaul atur tumu ti ulih diambi ngambi Klinik Pengerai Long Lama ulih nyendia servis pengerai pemadu manah ngagai komuniti.
Sapit Menteri KKM, Lukanisman Awang Sauni madah, iya balat ngemerat penanggul ba sitak dia kelebih agi bekaul projek bestatus raya.
“Tanah tusur ti nyadi ba Klinik Pengerai Long Lama mai pangka ngagai komuniti ditu kelebih agi ba sukut pengerai.
“Aku bisi dipadah bekaul tanah tusur ti agi nyadi ba klinik tu lalu naka diatu, operasyen klinik tu dipindah lalu dipejalai ba Balai Komuniti Long Lama berengkah ari bulan Ogos 2020.
“Nya alai, kitai mansik pekara ti patut diambi enggau sekeda perambu ti ulih nyadi atur lengkas ngambi Klinik Long Lama ulih beoperasyen ba endur ti patut.
“Kelimpah meri servis pengerai pemadu manah ngagai komuniti ditu,” ku iya pengudah nemuai gawa ngagai palan nya, kemari.
Dulu ari nya, iya bisi diberi penerang bekaul gaya taba Klinik Pengerai Long Lama ari Pegawai Pengerai Bagi Menua Miri, Dr Haniff Abdullah.
Pia mega, iya bisi dibai matau empas ari penyadi tanah tusur nya ti ngujung ke klinik nya rusak berengkah ari bulan Julai 2020.
Sekeda endur ba klinik nya ti balat rusak baka Bilik Berubat Pesakit, Bilik Servis Ngeli, Opis Pesakit Luar, Bilik Pakar Berubat Ruang Bilik enggau Bilik X-Ray.
Berengkah ari bulan Ogos 2020, operasyen klinik dipindah enda lama ngagai Balai Komuniti Long Lama lalu raban pengerai napi penanggul bejalaika operasyen klinik ketegal nadai fasiliti pengerai menyana enggau ti bukai.
Penulung Injinir Kanan Pampang Injinir Cerun, Indu Opis Kereja Raya (JKR) Malaysia, Ramlan Abdul Razak rambau meri licha nerang senentang projek enggau pengawa ngenyit dikena nagang tanah tusur ba taba klinik nya.
Ku iya, pengawa besai ngenyit dikena negap begunan deka dipejalai pengudah pengawa nyeleti tingkah tembu dipejalai lalu nya disadang tembu dalam timpuh setaun sebedau patut berengkah beoperasyen.
Lukanisman bela ngabas sereta ngaul bala pesakit enggau staf klinik dia.
