KUCHING: Komiti Pengawa Bepilih Besai (SPR) mesti ngembuan penyikap ti manah mungkur semua atur pengelikun ke diguna dikena nentuka pengelikun rayat maya ngatur Pengawa Bepilih Besai Nengeri (PRN) Ke-12 ila.
Pemikir Politik Prof Dr Jayum Jawan madah, SPR patut mantaila Atur Pengawa Standard (SOP) nyengkaum ngatur chara ke manah dikena nentuka PRN likun diatur.
“Naka tu kitai nadai ninga sebarang penemu baru ari SPR baka ni PRN ulih diatur enggau likun,” ku iya madah ngagai Suara Sarawak lebuh dipinta nimbal bekaul enggau PRN beduduk ari Sarawak diatu udah ngalih ngagai Pelin Penyuman Menua (PPN) 3.
Ku iya, nyema PRN diatur dalam taun tu, nya ukai ansak ngagai perintah Sarawak laban SPR deka nentuka pemutus bepelasarka utai ke nyadi ba menua sereta Proklamasi Darurat ke udah digerah Yang di-Pertuan Agong.
“Darurat di Sarawak enti nitih abis timpuh kena Februari taun baru sereta ngujungka PRN ulih diatur, nya alai atur nya mesti diketu dulu sebedau bepilih,” ku iya.
Ungkup penemu, Dun Sarawak udah abis timpuh kena 6 June tu tadi maya atur Proklamasi Darurat benung dipejalaika ba selampur menua bepun 12 Januari nyentuk 1 Ogos 2021, Dun mega enda ulih dipadam kena 7 June.
Udah nya, Yang di-Pertuan Agong Al-Sultan Abdullah Ri’ayatuddin Al-Mustafa Billah Shah udah ngaga pemutus ngambika Sarawak digerah atur Darurat bepun 2 Ogos 2021 nyentuk 2 Februari 2022 bepelasarka penyadi Covid-19 ke agi ngerekai.
