INDUN SILONG
Suarasarawak.news@gmail.com
BINTULU: Pengempu Wamaya Mesmerizing Beauty, Easter Emma ukai semina chakah bedagang tang chakah mantu raban tasah bah di Bintulu.
Taja kiruh nangkup peminta produk dagang pun taun, Easter ngulu tim Wamaya enggau sida sebilik limpang enda lama nyumai lalu nganjung pemakai ngagai raban tasah bah nya.
“Kami meri bantu kelebih agi ari sukut pemakai ti udah mansau ngambi ulih terus diempa sida laban kitai nemu sida nadai endur nyumai enggau diau.
“Pia mega, kami bisi nyendia urung 400 kantung pemakai baka kuie ngambi ulih diempa sida lebuh lapar,” ku iya lebuh ditanya Suara Sarawak, tadi.
Easter ti tebilang agi dikelala Indai Bilai ba media sosial, iya minta saup ari tim Wamaya enggau sida sebilik nyumai pemakai baka asi, lauk enggau sayur di rumah sebedau nganjung pemakai nya ngagai raban tasah bah di bagi menua Bintulu.
“Aku nyadung pemakai ba hari keterubah bah besai kena 29 Januari tu tadi ari rumah ke rumah nitih pematut kelebih agi sida ti balat agi kena bah.
“Kelimpah ari nya, aku mega bisi limpang nganjung bantu pemakai ngagai sekeda bala kitai ti ngenduh di jematan lambung ke balat dikunsi penguna media sosial empai lama.
“Timbal ari sida chukup manah, sida beterima kasih ngagai aku laban ti nadai endur diau, dapur enggau rumah udah ampuh naka perabung,” ku iya.
Easter ngangkan nya chukup positif mai semua rayat Sarawak begempung sereta betulung ngelempungka tating penusah pangan diri.
