Pengerami Benak 2021 disadang manah agi

SIMANGGANG: Pelin Pemansang Mengeri Simanggang ke benung dikemujur ditau dipelaba deka ngangkatka agi pemanah Pengerami Benak 2021.

Menteri Muda Pengelantang Komuniti Datuk Francis Harden Hollis madah, maya nya ila Pengerami Benak deka masuk renggat ke 20 taun ke udah diatur.

Ku iya, Pengerami Benak renggat ke-18 (2019) udah berengkah lalu penatai bala temuai kitu disadang manggai 30,000 iku mungkur temuai besemak enggau datai ari luar.

“Ba penemu aku pengerami ke diatur ninting taun tu enda kala ngasaka ati, pia mega serak tu diperati urung 30,000 iku temuai ngemenuhka mengeri Benak Malaysia tu.

“Tu ngelai mensia mayuh meruan nganti penatai pengerami tu.

“Nyadi enti bisi pekara baru ditambah tauka dikemanah baka eksibisyen pemansang mengeri Sri Aman, dudi hari ila sida tentu gagit deka meda pekara pemansang ke deka dipandang.

“Taun baru kitai deka neruska pengerami ungkup renggat ke-19, nyadi ba renggat ke-20 ungkup taun nangkan nya aku andal Pengerami Benak deka manah agi laban sekeda projek deka tembu lalu nya deka ngerichahka agi Pengerami Benak,” ku iya.

Harden ke mega Adun Simanggang madah munyi nya rambau hari kepenudi ngemataka Regata Benak Batang Lupar ditu kena Hari Minggu tu tadi.

Ku iya, entara projek besai iya nya pemansang tebing Batang Lupar ke nyadi palan endur ngatur Pengerami Benak.

“Perintah Sarawak udah ngemendarka agih RM12 juta lalu nya mungkur tiga renggat ditambah RM1 juta dikena ngaga empat tiang tinggi peninjau benak.

“Renggat keterubah udah berengkah, ditangkan renggat kedua enggau ketiga ke ditaga sereta.

“Projek nya nyentuk ngagai Sungai Simanggang lalu kitai nambah ba semak sungai ungkup bansal mit enggau palan nyual ikan Bulu kelimpah udah tembu jematan ila enggau pemansang betanam betupi sereta jalai baru baka jalai puntang ari Entulang ke Kejatau terus nuju jematan baru.

“Kitai mega deka ngaga palan ngelantang ati ke baru enggau galeri ba Rumah Sri Aman.

“Enti semua perambu tu bejalai enggau mujur, aku andal temuai ari luar deka mayuh agi datai ngagai mengeri Simanggang. Nya alai aku andal Pengerami Benak 2021 deka pemadu richah,” ku iya.

Berebak enggau nya, iya meri puji ngagai Tuai Pemegai Menua Tun Pehin Sri Abdul Taib Mahmud enggau Kepala Menteri Datuk Patinggi Abang Johari Tun Openg laban udah ngelimpangka awak nemuai ngagai mengeri Simanggang ngerichahka pengerami nya.

Suara Sarawak