KUCHING: Pengawa ngatur Pengerami Busking Kuching ulih ngengkah Sarawak ba kar dagang temuai pemerindang baka Pengerami Muzik Kampung Ujan Sedunya (RWMF).
Nya meh ulu lungga dibantai Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah.
Iya madah, pekara nya ulih dikeamat enti pengerami busking nya dikemansang nyadi pekit betikas nasional enggau antarabansa.
Ngelansa baru senentang penyulut RWMF urung 10 taun ti udah, ku iya, pengerami nya semina diatur ba skop ti mit lalu digulu urung 300 pengusung aja tang ninting taun pengerami nya majak ngerembai.
“Nyangka Pengerami Busking Kuching tu ulih nyadi Pengerami Busking Sarawak ukai semina dipasuk penyereta menua tu empu tang penyereta ari menua luar.
“Aku ngarap Pengerami Busking Kuching tu ulih setikas enggau RWMF,” ku iya rambau bejaku ba Penegrami Busking Kuching ba Plaza Merdeka ditu, malam kemari.
Ngelansa silik, Karim madah, ba mayuh mengeri dilawa sekali ke nya ba Singapore, Jakarta, London, Korea tauka sebarang endur, kitai deka tetemuka mayuh orang merindang ba tisi jalai (busker) ti ngerichahka mengeri nya.
Iya madah, pengawa merindang ba tisi jalai nya sebengkah seni ti meri peluang ngagai bala artis enggau sida ti bepenau mantaika pengulih sereta nambahka pengelandik diri.
“Ba Jakarta, bisi siku pemerindang ba tisi jalai ti ulih nyapai pemujur besai sereta nyadi orang kaya nengah penau dikembuan iya.
“Kekadang penau sida patut dikelala mensia mayuh baka ti suah dipeda kitai ba YouTube, siku indu ti kala main biola ari mit diatu udah nyadi siku pemerindang ba tisi jalai ti meri empas besai ngagai industri tu,” terang iya.
Karim madah, Kuching mega bela ngembuan sekeda pemerindang ba tisi jalai ti bepenau.
