PADAWAN: Pengerami Pedagang Gerempung Bansa Bisitang Kuching (PKBK) deka diatur kena 27 nyentuk 29 Oktober tu ila deka nyadi pelasar ngagai pedagang Bidayuh Bisitang mantaika penau dagang sida.

Kaban Parlimen Puncak Borneo, Datuk Willie Mongin madah, pengerami ti keterubah diatur ba Kampung Bangau nya meri peluang ngagai bala pedagang ngaul pengawa dagang.

Pia mega, ku iya, nengah pengerami nya, sida ulih ngelala dagang ti ulih dibantai kelimpah ulih minta bantu dikena ngepunka dagang diri ngagai raban perintah enggau ejensi bekaul.

“Tuju pengerami tu diatur dikena ngelala penau bala pedagang ba komuniti Bidayuh Bisitang ngambi sida terus dibantu.

“Pengerami tu mega dikena negap pemanah kaul enggau pangan diri ti mungkur 13 genturung pendiau ba sitak PKBK,” ku iya.

Willie mansutka jaku nya ba aum pemberita pengudah ngulu licha beserimbai Pengerami Pedagang PKBK ba Palan Servis Parlimen Puncak Borneo ditu, kemari.

Iya madah, pengerami nya ulih nyadi sebengkah pelasar dikena ngempung komuniti ba pengawa meri penyedar ngagai sida ba sukut akademik, jalai pengarap enggau lumba.

Terang iya, nengah pekara nya, kitai ulih nempa komuniti Bidayuh Bisitang ti sebela ari sukut akademik enggau tubuh.

Ku iya, PKBK ngembuan juluk deka ngatur pengerami nya nyadi program ninting taun lalu iya nyukung penuh perambu nya enggau tunga kuing ti udah dilangkar gerempung nya.

“Aku pechaya ADUN Mambong, Datuk Dr Jerip Susil meri sukung penuh dikena ngamat pengawa ngatur pengerami tu nyadi sebengkah pelasar dikena ngempung komuniti sida,” ku iya.