KUCHING: Pengerichah meda skrin besai Pengerami Nutup Lumba Asia Tenggara (SEA Games) Thailand 2025 di Sarawak Sport Village (SSV), kena Hari Enam nyadi timbal tumu ti positif nempa pemansang nuju pengawa ngatur lumba nya ba Malaysia ba taun 2027 kelebih agi ba Sarawak ti nyadi pengatur begulai.
Sekretari Politik Premier Sarawak, Dato Fazzrudin Abdul Rahman madah, penatai atlit sereta mensia mayuh ti nedatka SSV nyata nyeremin pengagit enggau semangat begulai entara rayat ngerami lumba pemadu besai ba rantau ASEAN nya.
“Tu pemungkal ti manah ngambi kitai ngepun pengerichah tu lalu kitai arap pekara tu terus nyentuk ngatur lumba nya ba taun 2027,” ku iya lebuh dirandau pemberita pengudah pengawa nya.
Dato Fazzrudin ti mega Kaban Kunsil Nengeri (ADUN) Tupong madah, pengawa ngatur Lumba SEA 2027 di Sarawak ukai semina meri perati ngagai pemujur atur lumba, tang mega nyadi pelasar pemadu manah ungkup atlit menua kelebih agi anak Sarawak nurai pemujur ba renggat serantau.
Ku iya, lumba nya nyadi kelang strategik ngangkat Kuching enggau Sarawak ngagai renggat Asia Tenggara seraya nyagu nama nengeri tu nyadi palan lumba enggau dagang temuai.
Ngenang pasal empas ngagai komuniti lokal, iya andal ke pengawa ngatur Lumba SEA 2027 deka meri empas besai ari sukut sosial enggau ekonomi nengah kerejasama mayuh sektor nyengkaum pemakai enggau ai irup, hotel, pengangkut sereta industri sukung bukai.
Ba pekara sebaka, iya madah kediri temegah enggau pemujur atlit Sarawak ti nambah lima midul emas ngagai kontinjen menua, seraya meransang atlit bukai kelebih agi rebak biak ngambi naka ulih nyapai pemujur.
Nangkan nya, Kaban Kunsil Nengeri (ADUN) Tanjong Datu ti mega Presiden Taekwondo Malaysia Azizul Annuar Adenan madah, pengawa milih Malaysia sereta Sarawak nyadi tuai rumah Lumba SEA 2027 udah meransang atlit naka ulih ngari ke menua enggau bepekit ba kelang diri empu.
“Nengah pengawa nyua tambai Persekutuan Lumba SEA ngagai Malaysia malam tu, kitai ngepun hari keterubah besikap nentuka Lumba SEA Malaysia nyadi entara ti pemadu manah dalam sejarah,” ku iya.
Iya mega andal ke kerejasama rat entara Perintah Sarawak begulai enggau tiga nengeri bukai ti ngambi bagi ulih ngemujur atur Lumba SEA 2027 ti ukai semina mujur, tang mega ninggalka kenang manis ngagai semua.
Sama datai, Pemangku Tuai Pegawai Eksekutif Kaunsil Lumba Sarawak (SSC) Khairul Nizam Morshidi. -UKAS






