Penguji besai ba Tembawai Tampun Juah

NYADI ari peminta kita ti bisi pengerindu macha utai ti ditulis John Adam Gilbert Anyai ngelama tu baikka ba facebook, ba blog iya empu enggau dikunsi ba Suara Sarawak, dia iya lalu tekuing runding ka bekunsika sekeda jerita pengidup diri empu ngelama tu.

Mayuh bala ngasuh John ngaga bup, tang nya nadai dalam runding iya naka ke diatu laban pengawa nya beguna ke belanja ti besai sereta mayuh pengiruh baik ba tubuh iya empu enggau semua kita ti nyadi pemacha.

Laban penemu ba bup diatu nyau alah laban penemu baru ngena chara digital ti kelalu jampat ngerembai nitihka gaya singkang pemansang dunya kemaya tu hari.

“Aku sigi rindu macha bup ensera lama kitai Iban kelia ti dikeluar ke Borneo Literature Bureau berengkah ari umur aku semilan taun.

“Aku mega bisi enggau ngambi peresa jaku Iban ba tikas peresa Lower Certificate Of Examination lalu bulih pemutus bulih grade A ba mata pelajar nya ba taun 1978.

NALI ADAT… Benung nyapi kenyalang lebuh sida Gawai Pandong Kenyalang nyerumba Gawai Serumpu Tampun Juah.

“Beduduk ari pengerindu ti angkunka semua pengawa kitai bansa Iban, dia dalam taun 2008 aku lalu ngaga blog ti tau dipeda kita ba http://johnadamgilbert.blogspot.com ti ngembuan mayuh bengkah jerita ti tau dibacha kita,” ku iya ngepunka kenang.

Rindu diau dalam babas

John madahka diri sigi lain pengerindu ari bala menyadi iya ti bukai, lalu kami diri menyadi bisi lima iku, tiga lelaki enggau dua iku indu.

Kebuah John ngumbai diri lain laban iya ari umur aku lapan taun sigi enda nemu takut ke petang sereta ka bendar diau dalam babas tajapan ada ba Sepital Simanggang taun 1964 lalu besai di Saratok kenyau ari taun 1968 nyentuk nurun gawa nyadi polis ba taun 1982 laban nitihka apai iya gawa ba Opis Kereja Raya (JKR) Saratok.

“Abis latih nyadi polis ba Pulapol Kuala Lumpur, dia aku lalu diasuh orang gawa ba Kepayan, Kota Kinabalu, Sabah ari taun 1983 nyentuk ngagai taun 1991.

“Aku lima taun gawa ba Pasukan Polis Hutan udah nya baru pindah ngagai Indu Opis Polis Kontinjen Sabah.

“Sekumbang ti gawa dia aku endang semampai enggau orang ngereja pengawa ti lelak tang chukup ngerinduka ati.

“Nyau deka pupus menua Sabah udah ditujah aku laban ti semampai keluar masuk enggau orang operasi baik ba pulau entara menua enggau Philippines, enggau ba antara menua kitai Sabah enggau Sarawak.

“Aku mega ampit enggau escort bala anembiak ari Upphingham University England begulai enggau bala anembiak ari Yayasan Sabah matau Gunung Kinabalu sepengelama seminggu diau ba tuchung din.

“Udah nya, seminggu diau ba Banjaran Crocker lalu ke penudi dibai sida belajar scuba diver ba Pulau Memutik seminggu,” ku iya nikalka kenang.

John madah, ari peneleba ti ngereja pengawa baka nya dia iya endang siku ari pengari Indu Opis Polis Kontinjen Sabah ba Lumba Olahraga enggau orang ngambi bagi ba 10,000 bejalai kaki.

Iya mega empat taun bejurut ngarika PDRM ba pekit niki Gunung Kinabalu ke dikumbai MAS Mt. Kinabalu International Climbathon ari taun 1987 ngagai 1990.

“Pemutus pengabis manah ulih aku iya nya lumur 17 nurun niki sepengelama 4 jam 51 minit 36 sikin belaban enggau orang ari serata dunya dalam taun 1987.

“Nyadi aku udah niki Gunung Kinabalu sebelas kali sekumbang ti udah gawa din suba,” ku iya lalu tuchum ngenang cherita niki bukit pemadu tinggi ba menua Asia Tenggara nya.

DIBASA… John miau piring ke bala raban sida ti enggau iya ngulu pengerami Gawai Serumpu Tampun Juah.

TEMBAWAI TAMPUN JUAH

Taun 1991 John pindah pulai ke Sarawak lalu gawa di Sarikei sampai taun 2004 sebedau pindah ke Miri.

Lebuh ba Miri, iya udah empat kali ngagai Gua Niah lalu sekali niki ngagai tebing Gua Lobang enggau Gua Tulang laban ka meda tajau ke endur orang nyimpan bangkai.

“Tang sayau tajau ba endur nya udah dipechahka orang ti ngambi sarang lelayang dia.

“Taun 2019 aku pindah ngagai Indu Opis Polis Kontinjen Sarawak di Kuching nyentuk ke diatu,” ku iya nusui pengawa diri.

Nyadi ku John, kitai semampai ninga tusui orang ba ensera tauka jerita tuai ti bisi nyebut mayuh nama petara kitai Iban kelia enggau menua sida ti nadai nyengenda ditemu kitai meruan alai.

“Kala ba runding aku empu amat bisi tauka enda jerita tu, tauka iya semina ditempa orang ngapa ngambi ke nyamai didinga nyadi ke jerita orang kelia.

“Aku udah macha bup jerita bekaul enggau Tembawai Tampun Juah, iya nya tembawai ke penudi kitai Iban sebedau kitai beserara enggau orang Panggau.

“Lalu aku mega udah ninga jerita nama utai ke kala nyadi dia nitihka tusui bansa Dayak Bugau ari Ketungau, Kalimantan Barat,” ku John nampung kenang ke ujung agi.

Nyadi kena 1 September 2019, dia bala Dayak Bidayuh ari Kampung Segumon kira pejalai 45 minit ngena kerita ari Balai Kerangan tauka 30 minit ngena motorsikal nengah jalai chit ari Kampung Mongkos, Serian bisi ngintu pengerami dikumbai sida Gawai Serumpu Tampun Juah.

John lalu mai bala kaban iya kira bisi 25 iku enggau kia, lalu bala sida Dato Sri Edmund Langgu bisi kira 90 lebih iku sama enggau datai ngulu pengerami nya.

“Datai dia, kami balat andal ati meda gaya pendiau sida dia sereta chara sida ngintu pengerami sigi endang ngena adat asal bansa kitai Dayak Iban, Dayak Bidayuh, Dayak Sebaruk, Dayak Sisang, Dayak Ahe, enggau mayuh agi bansa Dayak bukai ke enda temu aku.

“Chara sida nyambut penatai semua kami ke datai endang penuh enggau adat basa.

“Lalu ba malam ti kedua aku lalu madah ngagai kami sebuat nusui diri ka tinduk ba tembawai nya ngichaka diri tau bisi kenyap betemu enggau petara kitai Iban.

“Ninga munyi nya dia semua kami ke lelaki betubuh sebelas iku lalu sama enggau aku tinduk kia magang.

“Kami datai ba tembawai kira pukul 9 malam. Bala sida raban Tajai sama enggau kami ka tinduk dia.

“Lalu sida nyikap diri genap rengka bebaika injin api. Naka penerang rampa tembawai nya, enda nyalah asai ke meda orang rami sekula kelia.

“Kami ke tinduk dia begulai alai saum tikai. Sekumbang kami ke berandau nganti mata ka tinduk dia kaban siku ke benung bemain telefon tekenyit meda bisi titik darah ninggang jari iya.

“Lalu siku ke gali garing-garing tekenyit meda tambai menira kami nemu engkebut tang nadai angin muput.

“Aku tinduk kira nyau pukul 12 tengah malam. Injin api nya padam nyau ka pukul tiga pagi.

“Aku tedani kira nyau ka pukul empat pagi laban ensium bau insap gudang garam. Udah nya aku lalu enggai tinduk agi,” ku tusui John.

KELAI MENUA… Raban ari Sarawak mai pentik ti deka ditanam ba Tembawai Tampun Juah.

NAPATKA BARU NALAN

Nyadi bala anembiak raban Tajai bisi madahka diri ninga munyi buah rian labuh tang digiga lalu enda temu udah sida ninga puchuk rian nya munyi ke dipuput ribut.

Iya meh hari nyau majak tebererak teringkas tawas bala kaban aku lalu dani magang begauka sida tinduk dikelingi semada bangat ngemayuh nya.

Bisi nya nyau setengah stokin dibalut semada tang meh siku pan nadai nusui diri diketup semada nya.

“Udah nya kami lalu besikap mulaika diri bedarat ngagai Kampung Segumon kira bisi 20 minit pejalai lantang.

“Udah ngirup kopi lalu ngemas semua utai diri, semua kami lalu pulai magang ke menua kitai di Sarawak ditu.

“Sebedau kami mupuk aku bisi nyebut baru madah kadiri ka datai kia baru dudi hari ila.

“Seminggu udah pulai ari nya aku semampai bemimpi belama, nyau ka tiap malam asai ke begulai enggau orang mayuh ngena ngepan Iban tang enda dikelala. Orang menua nya manah bendar begulai enggau aku.

Nyepi diri lain asai dia aku lalu nanya kami sebuat ke sama udah enggau tinduk dia enti bisi ati ka enggau aku kia baru. Siku pan sida nadai madahka diri ka enggau kia ke agi.

“Tang bisi kaban aku siku anembiak Dayak Bidayuh ari Balai Kerangan madahka diri endang keran ka enggau aku.

“Nangkanka iya nya bisi siku kaban aku ari Miri ke udah enggau kami tinduk dia pan madahka diri endang keran ka enggau aku ngagai tembawai nya baru.

“Kira dua minggu udah nya kami tiga lalu datai kia ke baru kira pukul 9 malam. Nambahka tubuh kami tiga nya bisi siku bala Dayak Bidayuh ari Kampung Segumon enggau siku Dayak Bidayuh ari Kampung Kembayan, Sanggau ka enggau laban madahka diri ngibun rengka kami ti tinggal ba bansal,” ku iya lalu nyintak seput panjai.

John nampung baru, lebuh sida sebuat baru ngenatai kediri ba tanah tembawai nya dia hari lalu belabuh ujan naka pemangat.

“Kami lalu beguai napatka bansal ti endang udah tegap digaga orang dia nyadi ke palan endur makai maya sida bisi pengawa ba tembawai nya.

“Meda hari enda ulih anti teduh ujan, dia aku lalu mai sida ngiga daun ririk, ngiga randau enggau buluh dikena ngaga teresang.

“Kami sama merening mua pangan diri. Meda baka nya aku lalu dulu mupuk ke bala kami sebuat ngagai tugong pentik ba tembawai nya.

“Sebedau datai ba pentik, lebuh aku mansa pun rian ke bisi didinga bala raban Tajai labuh, dia aku naka penakut sereta geremai semua tubuh laban ensium utai tak bau bout bangkai.

“Aku sigi nemu nya utai nguji aku. Puas ke gining-gining semak pentik dia, nasib bendar aku lalu tetemu ke buluh ti udah dikena bala maya rami Gawai Serumpu Tampun Juah suba nuatka menira.

“Lalu nya meh dibabut lalu ditaban aku ngagai bansal. Kaban ke bukai agi ngeringak begiga ke randau enggau daun ririk.

“Nyadi seduai nadai ensium bau utai baka ke disium aku. Udah tembu teresang digaga aku lalu mai seduai nya belabuh miring.

“Lebuh aku nabur beras kuning enggau rendai, dia anembiak Bidayuh nya tak gining gining merening utai kin kitu.

“Benung kami duai mela piring dia anembiak Bidayuh tiga iku nya lalu betelai enggau pangan diri sereta nengau lampu pichit ngagai tunga pun rian ke alai aku ensium utai bau bout.

“Udah tembu miring, nya baru anembiak Bidayuh nya madahka diri bisi meda ini tuai orang ngena baju burak lalu bouk panjai ba pun rian nya.

“Lebuh aku naburka berau kuning enggau rendai iya meda mayuh bala anak mit datai berebut ngumpul rendai enggau berau kuning nya.

“Pia mega lebuh aku miau piring dia iya nusui diri meda mayuh orang tuai ke tegap gamal sereta endang orang ke benama besai pangkat datai kia,” terang John.

NEMU NELA

Nyadi anembiak Bidayuh tu bisi ngembuan penemu ulih meda utai ke enda dipeda kitai mayuh ngena penemu kuasa Panca Indera Ke Enam (Six Senses) ku iya.

Tembu miring kami lalu nunu manok ngambi ke bisi diempa lalu diengkah ba piring ke ka dikena pangkang kami duduk.

Kami nudukka diri ngibun piring semak pendai Keling berengkah ari pukul 10 malam datai ke pukul 4 pagi.

Hari malam nya ujan lalu semua kami basah jempuk magang tang nadai berasai chelap.

Kaban Bidayuh nya nyau bekuruh bebungkur apus baka bangkai orang ke udah parai ba kerangan.

Ai sungai nadai bemunyi, nadai nyamuk, burong pan nadai bemunyi, nadai utai ngasuh takut malam nya.

Tang dian ke ditungkun kami ari pukul 10 malam nyentuk ke pukul 4 pagi semina setengah aja empa api.

Kira pukul 4 dini hari mabu nya baru kami bisi ninga munyi orang nyauk merebukka labu ngambi ai.

Ku anembiak Bidayuh nya, iya meda orang indu udah nurun nyauk ke ai lalu mai kami ngetu pulai ngagai bansal ke alai bala bukai nganti.

Datai ba bansal kami lalu nindok kadiri nganti hari tawas. Udah kami dani lalu beguai berati ke beras kuning enggau rendai ke ditabur aku lebuh maya miring malam nya.

Taja pia, papan nyau baka ke disapu nadai uras. Udah nya kami lalu bebai mandi ke ai lalu ngetu dulu ngabas piring ba pentik.

Ba pentik nya telu ba piring kaban aku ari Miri sigi lenyau enda temu penunga.

Nyadi ba piring ke dipangkang kami duduk enggi anembiak Bidayuh nya telu dua igi lenyau enda temu tungga.

UKAI NGIGA NAMA

Udah mandi kami lalu bejalai diri dia, endur anembiak Bidayuh nya madah kadiri bisi meda lelaki siku bejalai datai ari pendai tang udah nya lesap enda temu tunga.

Kami lalu pulai ngagai bansal nanya anembiak ke ngibun rengka kami nyangka bisi orang bukai datai kia tumu pagi nya.

Nyadi ku anembiak nya, nadai orang bukai kia semina bala kami aja. Kami lalu bebai makai teda manuk ke ditunu kami malam nya.

Manuk nya baru lanjau kira mesai betis tang enda ulih abis empa kami tubuh lima.

Nyau ka pukul 8 pagi baru bisi tiga iku bala Bidayuh ka nurun ke umai diasuh kami ngetu makai tunu manuk nya.

Nyadi anembiak Bidayuh ke tinduk bebungkur apus ba kerangan malam nya nusui diri bemimpi meda kami ke duduk nya ba ruai rumah orang.

Tang rumah puang nya ku iya, nadai meda orang ayan. Nya kebuah kami enda chelap lalu enda diempa nyamuk, tajapan kitai sigi nemu diri diau sebelah babas ngelaban ujan.

Udah tembu sida makai tunu manuk nya, baru kami mupuk mulaika diri ngagai Kampung Segumon.

“Datai ba rumah kaban dia aku lalu mandi. Tembu mandi aku lalu pansut ke ruai lalu tekenyit meda bisi apai tuai orang siku duduk ba ruai nya berandau enggau bala bukai.

“Sida lalu nunjukka aku madah ngagai apai tuai orang nya, aku tu ti nyadi ketuai ke bala kami ti ngagai Tembawai Tampun Juah lalu bemalam dia malam nya.

“Tekenyit bendar aku ninga sida munyi nya, aku lalu madahka semua kami ke kia sebaka magang lalu nadai betuai ke pangan diri.

“Udah nya baru anembiak Bidayuh ke empu rumah nya madah ngagai aku orang tuai nya tadi, iya nya Temenggong Kampung Segumon.

“Lalu iya meh ke megai kuasa dikumbai Megai Kunchi Tembawai nya enggai ke kitai tau bulih penusah enti datai kia enda enggau pinta.

“Nyadi kami lalu mayar duit adat ngagai iya ke megai kunchi nya RM50.

“Temenggong nya lalu lama bendar merening mua aku enda pepesap leka mata. Lalu aku pan merening iya baka nya.

“Udah nya baru iya bejaku nanya aku, ka nemu ke nama penemu dikena kami datai ngagai tembawai nya lalu ulih ngapuska malam sampai nyau laun pulai pagi nya.

“Aku lalu madah, kami semina datai mai piring aja kia.

“Udah nya iya lalu madah, bala orang ke udah selalu datai kia beniat ngena piring tang enda kala apus malam.

“Abis laun sida mulaika diri ku iya kira pukul 10 malam. Mayuh ke lari digagai antu, nyentuk entuka sida nyau digusak antu lebuh mulaika diri. Udah ke randau ruai enggau Temenggong nya kami lalu mulaika diri.

“Kira 10 minit udah ngejang ke rumah ke alai kami ngetu nya, dia anembiak nya telefon ngagai aku ngasuh bejimat deriba niti jalai laban maya aku mupuk ninggal ke rumah iya, iya tepeda ke baka bisi asap besebun lalu bisi indu nitihka aku pulai.

“Kira dua minggu udah nya dia anembiak ke empu rumah ba Kampung Segumon nya lalu ngasoh kami duai sama datai kia ke baru laban iya madah Temenggong sida ka meri kami duai anugerah.

“Aku lalu nanya ke anugerah apa ti ka diberi iya ke kami duai. Ku iya Temenggong ka meri anugerah Panglima Antara Benua.

“Aku lalu jampat nyaut madahka penatai kami duai ngagai Tembawai Tampun Juah nya ukai ka ngiga diri dikumbai orang panglima tang ka nemu nama utai ke amat nyelai nyadi ba endur nya.

“Kami duai semina ka nerima anugerah enti utai nya diberi sida ngena chara adat sida menua nyin tauka endang diberi Bupati Sanggau (Resident Sanggau Residency).

“Ukai gelaran disebut pia aja seneka ati enggai ke kitai diketawaka orang ngapa jemah ila.

“Jerita tu agi ditampung aku baru udah tu ila. Terima kasih ke pengerindu kita macha posting aku tu,” ku John nyimpul kenang serak tu.

Suara Sarawak