Pensel Pemun gelumbang besai pengidup

SIMANGGANG: Pensel kelai kitai maju, kelai pengelantang lalu ari sebatang pensel mega ulih nempa modal mensia ti menyana.

Ku Kaban Parlimen Saratok, Ali Biju, pensel dikena kenyau ari hari terubah kitai belajar nulis sekalika ba pra sekula tauka primari satu lalu pensel tu ngajar kitai reti pengeliat ati.

“Sebatang pensel berega 20 sen dikena nulis lalu diraut kitai enti mata iya tumpul dataika abis tauka tinggal seinchi pemanjai.

“Ari nya kitai berati, seagi pensel tu ulih dikena, kitai deka ngena iya dataika abis, bebulan pengelama. Ari utai ke ditulis, dibacha lalu kitai meretika iya, dataika kitai lanchar macha lalu tu dikumbai orang ngiri penemu,” ku Ali.

Iya mansutka jaku tu lebuh bejadika Karnival Sri Aman 2019 diatur ba Kompleks Sukan Sri Aman ditu, pagi kemari.

DEDAT… Mensia mayuh bela gagit ngambat penatai Ali sereta bala pemesai bukai.

Ku iya, kitai mensia ngemunka pelajar ari sebatang pensel lalu pekara tu dikena tim Projek Pensel betuaika Norina Umoi Utot mai pengelantang ngagai komuniti.

“Pensel tu tau ngemun gelumbang besai mai komuniti sedarka pemesai guna pelajar ari mayuh sukut, nentuka sida enda tinggal ari segang pemansang dunya kemaya hari.

“Nya alai aku chukup temegah ati meda pemanah pengawa udah dipejalai tim tu taja suah ala belanja lebuh ngatur aktiviti.

“Sekumbang tiga taun udah ngatur aktiviti ngaul komuniti renggat baruh, ari nembiak pra sekula nyentuk orang tuai nengah kelas, chukup manah lalu patut ditunda bala NGO bukai di menua tu.

“Tabi puji ke pengiruh enggau pengepuh kita gawa ngelama tu, nadai kala leju sereta mantul ati mantu rayat, ngembing bala nembiak enggau orang tuai meretika pelajar sekula.

“Ari sukung kitai tu ngasuh kitai sedarka reti ngiri penemu enggau pelajar tu ungkup semua renggat umur, nadai tatak sereta enda ditagang. Semua kitai bisi hak belajar, ngelala A B C, nemu macha enggau ngira sereta nulis,” tandu Ali.

DIPEBASA… Ali nyain plak kelai bejadika Karnival Sri Aman 2019 seraya dikemata bala bukai.

 

BEBAJIK… Sekeda ari bala indu dara ngelalu penatai bala temuai dipebasa rambau pengawa bejadika Karnival Sri Aman 2019.