Penuduk dalam GPS, dilempai ngagai KM

PADAWAN: Menteri Muda Perengka Pengangkut Dr Jerip Susil ngelempaika ba pemanah runding Kepala Menteri (KM) sentang penuduk iya dalam Gempung Parti Sarawak (GPS).

Dirandau pemberita pengudah ngelepaska anak ikan di Kampung Semadang kemari, iya enggai bejuraika pekara nya enggau panjai.

“Parti ni ti deka disereta aku dalam GPS, pekara nya dilempaika ngagai kepala menteri.

“Kepala Menteri pan udah mansutka penerang sentang pekara tu, ketegal nya aku enggai bejaku mayuh,”ku iya.

Dulu aku ari tu, Kepala Menteri Datuk Patinggi Abang Johari Tun Openg madah Dr Jerip mengkang dalam GPS alai iya mega udah ningkilka diri ari Parti Sarawak Bersatu (PSB).

Kelimpah ari nya, Dr Jerip mega udah ngenataika pinta nyereta siti ari parti dalam gempung GPS alai pinta nya benung diperunding Abang Johari ke nyadi Chairman GPS.

GPS diarika empat parti iya nya Parti Pesaka Bumiputera Bersatu(PBB), Parti Rakyat Sarawak (PRS), Parti Demokratik Progresif(PDP) enggau Parti Sa’Ati Rakyat Sarawak (SUPP).

Ba ubah mit kabinet negeri ke digaga bedau lama tu tadi, Dr Jerip mengkang dinan mangku pengawa menteri muda perengka pengangkut betuaika Datuk Lee Kim Shin ke nyadi Menteri Perengka Pengangkut ke baru.

Ubah nya digaga pengudah Datuk Sri Wong Soon Koh ngelengka pangku pengawa Menteri Pekara Wang II sereta Menteri Dagang Entarabansa enggau E-Dagang.

Dr Jerip dulu agi ari tu udah ningkilka diri ari PSB alai iya mangku pengawa nyadi mandal presiden parti.

ENGGAI JAKU MAYUH…Dr Jerip Susil bejaku ngagai pemberita di Kampung Semadang, Padawan.

Suara Sarawak