Penulin main asal Iban ditan

KUCHING: Tuju enggau juluk Serakup Ngajat Asal Iban Sarawak (Ngasi Sarawak) ditumbuh kena ngetanka seni budaya raban bansa Dayak Iban nentuka seni nya dijaga meruan lalu dipebasa nyadi pesaka asal bansa.

Ku Presiden iya, Ajat Sumoh, niat sida sebuat endang keran nyaga enggau nampung pesaka bansa kelimpah ngetan enggau ngintu adat nyengkaum main asal ke bukai.

“Kitai sedarka seni dikembuan bansa Iban chukup nyelai lalu enda ulih dikeluang ari nerima ubah pemansang jeman, nya kebuah endang patut dipatau ngambika iya seruran setipak enggau seni budaya asal menua.

“Pangku pengawa serakup tu nempa rebak baru ari bala nembiak ti bisi pengangkun ngetanka penulin seni ajat sereta ngangkatka seni budaya enggau pesaka asal Iban.

“Kebuah pia laban semua pesaka enggau daya idup tu nyadi kelai bansa, peninggi nama enggau asal penatai kitai ti patut ditan ngambika bisi ditampung rebak dudi,” ku Ajat ngepunka randau enggau Suara Sarawak.

MANDING… Bala indu nyempulang sida ke lelaki ngajat ngelalu temuai.

Ku iya, seni budaya ti ditampung raban bansa Iban datai ari mayuh macham penau enggau pengelandik sekalika nya benyawa tauka ari keranjai jari.

Ambika chunto, serakup sida ngetanka tanda asal Iban iya nya ajat nyengkaum kereban dikena betabuh ti nyempulang ajat sereta gendang pampat.

“Kami mega ngatur bengkel ngaga tauka nengkebang kereban main asal bukai baka terabai enggau gendang, gagung enggau lesung khas dikena ngajat sereta bungai papan.

“Enda tinggal mega raban Nembiak enggau Biro Indu chakah ngatur program ke patut pulaika pemaik ngagai bala kaban serakup ari ajar sida ti bepenau ba pengawa nya,” ku Ajat nerang.

Dikena nyapai juluk nya mega ke alai Ngasi Sarawak numbuhka tiga raban khas ngemujurka pengawa iya nya Akademi, Biro Indu enggau Raban Nembiak.

CHUKUP NGEPAN… Sida ke indu bebajik ngerasuk ngepan lebuh ngajat.

Ketetiga raban tu ku Ajat endang menggi pangku pengawa nyeridi enggau ngajar rebak nembiak ngambi ngelala, mereti, nemu enggau belajarka pesaka bansa, pengelandik jari sereta pengawa asal Iban.

“Aktiviti ti diperambu genap raban tu nyelinting raban nembiak akademi enggau kaban serakup ti diatur nengah bengkel, kelas enggau program dikena nerenak ulah talukka main asal enggau pesaka menua.

“Laban sedarka pemesai reti enggau peninggi rega ti enda ulih dibeli ngena mata duit, nya kebuah kami sebuat mansal diri ngambi liat ati nyidi enggau nyabang penemu ari sida ke tuai ngambika ditampung rebak baru.

“Seni budaya tu chukup berega, mai reti chukup besai sereta nyadi kelai bansa Iban lalu tu mih ke peransang kami ngambika enda mudah mantul ngapa enti apin tepantup ba bandir,” ku Ajat madah nyemetak lebuh dirandau Suara Sarawak.

Peransang besai Ngasi Sarawak angkat lalu chakah nyingkang ke mua ngetanka main asal berindik ari seruyut ubah jeman ti ngeruga penulin tanda asal nyengkaum chara ngerasuk ngepan ti enda berurun, nadai nitihka lebas.

REBAK BARU… Bala nembiak mit indu enggau lelaki diajar ngajat ba Akademi Ngasi Sarawak.

Pekara baka tu balat ngemaruhka adat enggau daya idup kitai ba main asal lalu tau mega ngamahka nama bansa, tau ngasuh lenyau kelai tauka identiti.

“Kitai irau sereta nangika rebak dudi hari nyau enda ngelala ni bagi bansa adat, main asal enggau gaya ngepan ti betul laban udah kelalu nyimpang ari asal.

“Ketegal kelalu deka dipeda orang kreatif, landik nengkebang utai baru ngujungka pekara pemun ba main asal enggau ngepan kitai nyau lenyau identiti, enda dipebasa.

“Taja ukai semua nyukung pengawa baka nya, mayuh agi ke mejah laban nemu pemesai reti ngepan kitai bansa asal kelimpah nimbal penemu bala mayuh, Ngasi Sarawak naka ulih ngetanka penulin ajat, ngepan enggau bansa tabuh dikena.

“Ambika chunto, enti Ajat Lesung tentu deka bisi lesung dipanggum lalu tabuh mega deka lain agi, bebida ari tabuh ngelalu temuai niki. Baka nya mega ngepan sida ke lelaki ti ngajat, ngena lelanjang, enggau besirat, dilagu enggau marik, tumpa enggau simpai,” ku iya ngelansa silik.

NYEMPULANG AJAT… Tawak, engkerumung enggau bebendai deka dipangkung seraya gendang ditempap lebuh ngajat.

Ku iya, pekara tu setipak enggau tuju kitai ti dekaka pemansang enggau nambahka daya pemintar runding tang agi bepegai rat ba pun daya idup bansa.

Ajat mega sedarka tuju enggau juluk serakup enda ulih dijapai enti nadai kerejasama enggau sukung bala kaban enggau mensia mayuh ke bukai.

“Sukung enggau kerejasama bala bakih ti bela angkunka seni budaya sereta embing ari bala pengajar ti bepenau pasal seni budaya enggau pengawa asal udah meri peransang ngagai kami.

“Jaku ajar sida mega meri kami semengat seruran gawa ngetanka penulin ajat enggau pengawa asal bukai nentuka serakup majak ngerambai, gah nyingkang ke mua mai identiti bansa.

Nya alai Ajat ti mega chairman mendam Ngasi Sarawak suah nandu jaku tesau ngagai mensia mayuh nyengkaum rebak biak anang berasai sanggu belajarka main asal ari nyereta tauka ngulu kelas, bengkel enggau program ti bisi diatur serakup sida.

KENANG KAMI… Bala penyereta kelas ajat sedia merindang bala mayuh enggau tanda asal bansa Iban.

Ngasi Sarawak bisi ngatur kelas Ajat Indu enggau Lelaki, kelas nusuk manic, bengkel ngaga terabai, gendang enggau lesung nyengkaum belajar ngukir enggau nyimpai.

Nambahka nya ku Ajat, sida mega bisi nyendiaka kelas berapi enggau ngaga kuih, nyumai pemakai asal ungkup sida ke indu seraya bala nembiak lelaki dibai nurun ke tanah, nyayat kayu ti deka digagaka lesung, gendang enggau terabai.

“Sida ti udah ngulu kelas main asal baka ngajat enggau tabuh sereta gendang pampat ulih mantaika penau diri sereta bisi pengandal tinggi maya merindang bala mayuh.

“Tu mega deka nambahka agi pemanah ajat, tabuh enggau tempap gendang pampang seraya meri nilai tambah ngagai main asal kitai bansa,” tandu iya.

Ngenang sekeda ari pemujur pengerami besai kala diatur serakup sida taja apin datai ba tikas antarabansa, tang Ajat madahka diri chukup temegah ati.

Semua tuju pengawa tauka pengerami diatur endang dikena ngangkat enggau ngetan seni budaya bansa Iban ngagai tikas tinggi agi, ke diatu udah manggai tikas bagi menua enggau renggat nengeri.

“Kami sebuat ngeringka ati diri mungkal singkang Mandangka Main Asal Iban ba Pengerami Makai Lemai enggau Mantar Gawai Dayak 2016 di DBNA Kuching ditu ke alai Presiden SDNU, Tan Sri William Mawan nyadi tuai pengabang.

“Ba taun ke sama mega, kami dipebasa Mandangka Ngajat Theater Ensera Raja Langit di Auditorium Taza, Institut Pendidikan Guru (IPG) Kampus Batu Lintang di Kuching ti dipenyadika Sapit Kepala Menteri Sarawak, Datuk Amar Douglas Uggah Embas.

“Udah nya kami Mandangka Main Asal Iban ba Pengerami Makai Lemai enggau Makai Taun Keterubah ti ngangauka Kaban Parlimen Batu Kitang, Ir Lo Khere Chiang nyadi temuai dipebasa lalu bejadika pengerami ti diatur ba Hotel Penview ditu kena 15 April 2017.

“Taun 2017 enggau 2018 mai kenang chukup manis ngagai Ngasi Sarawak pengudah dipadu menggi gelar champion enggau pemerindang pemadu manah ba Pekit Gendang Pampat di Sk Melugu Sri Aman.

“Nangkan nya, kami mega mujur ngatur Malam Main Asal Iban enggau Pemerindang dipenyadika Menteri Muda Nembiak enggau Lumba Datuk Snowdon Lawan di UniCentral Samarahan kena 9 September 2017.

“Mandangka Main Asal Iban ba Pengerami Ngelancharka Bengkel enggau Hari Begulai Enggau Mensia Mayuh Ngasi Sarawak dipenyadika Menteri Muda Kaunsil Kandang Menua, Datu Dr. Penguang Manggil, dikena kami nutup taun 2017,” ku Ajat ngelansa silik pasal pejalai dua taun keterubah serakup sida.

Ba taun 2018, pengudah menggi gelar Champion enggau Pemerindang Pemadu Manah ba Pekit Gendang Pampat Renggat Kedua di SMK Melugu, Sri Aman, ditangkan pengawa mandangka Main Asal Iban ba Pengerami Bejadika Serakup Ngasi Sarawak enggau Mantar Gawai 2018 dipenyadi Adun Bukit Begunan, Datuk Mong Dagang.

Ku Ajat, sida mega bisi ngaul diri Mandangka Main Asal rambau Bejalai Bebala Mayuh Gawai Dayak Niti Daun renggat Nengeri Sarawak ba Tebing Sungai Kuching ditu lalu mujur menggi gelar Champion enggau Pemerindang Pemadu Manah.

“Serakup Ngasi Sarawak nutup taun 2018 enggau pengawa Mandangka Main Asal Iban nyerumba Pengawa Nyuaka Setipikit enggau Hari Begempuru ke alai sida bebasaka Adun Batu Kitang Ir Lo Khere Chiang bejadika pengerami sehari nya.

“Mungkal taun 2019, kami mujur ngatur pengawa Mandangka Main Asal Iban beserimbai enggau Pengerami Makai Lemai Ngenang Jasa enggau Mantar Gawai 2019 ti ngangkatka Menteri Muda Industri enggau Beranakka Puku Malcom Mussen Lamoh bejadika pengerami kena 4 Mei tu tadi,” ku iya.

Ajat enggau Ngasi Sarawak besai amat pengandal deka meda main asal kelebih agi ajat Iban tu ukai semina majak ngerembai enggau ditampung rebak dudi tang agi ngetanka penulis rentak, gaya tanda enggau keresa ngepan.

“Kitai enda ulih ngubah utai ti udah nyadi tang kitai ulih ngajar, meri peluang ngagai rebak baru ngansah penau enggau pengelandik sereta nerenak ulah angkunka main asal bansa sida.

“Kitai mega ngandalka bisi ejensi tauka raban besaup gawa, ngempung enggau ngarang semua main asal tu nentuka iya enda mudah lenyau ngapa dibai arus pemansang dunya kemaya hari,” ku Ajat madah nyemetak.