Penumbuh palan servis di Nanga Ngungun diperambu

KUCHING: Perintah Sarawak merambu deka numbuhka palan servis di Nanga Ngungun ti deka meri servis ngagai Pasar Ngemah enggau Pasar Nanga Dap.

Menteri Muda Pemansang Nengeri enggau Pengeraja Asal Datuk Len Talif Salleh madahka, Perintah Sarawak benung ngumpul data sereta berandau enggau piak bekaul kelebih agi ba pengawa nyendiaka pelin ungkup palan nya.

Ku iya, Nanga Ngungun dipilih nyadi palan servis ungkup endur nya berindik ari endur nya ba simpang jalai baru Sibu enggau Kapit sereta penuduk iya ba entara Kapit enggau Song.

“Ukai nya aja, perambu endur numbuhka palan servis di Nanga Ngungun tu kurang ari 10 kilometer ari Pasar Nanga Dap enggau Pasar Nanga Ngemah,” ku iya.

Len madah munyi nya lebuh nyaut tanya Adun Ngemah Alexander Vincent berkaul enggau perambu Perintah Sarawak ba pengawa ngemansangka Pasar Ngemah, Pasar Nanga Dap enggau Pasar Sengayan ba Aum Kedua Renggat Kelima Dun Ke-18 ditu, kemari.

Berebak enggau nya, Len madahka entara perengkaguna ti deka disediaka ba palan nya nyengkaum taba komersial, balai gempuru, langkau Rela enggau polis.

“Kelimpah ari nya, perengkaguna bukai deka ditambah pengudah pansik ti silik dipejalai sereta nitihka guna peranak beserimbai enggau palan nya,” ku iya.

Ungkup Pasar Sengayan, Len madahka peranak ke diau di Pasar Sengayan tau ngulihka servis ari pasar Kanowit berindik ari endur nya semak enggau Pasar Kanowit.

Suara Sarawak