KUCHING: Bisi 80.6 peratus pun penyadi penusah aksiden jalai alun endang bepun ari ulah mensia, ku Kaban Parlimen Stampin, Chong Chieng Jen.
Iya madah, statistik nya bepelasarka pansik ti dipejalaika Institut Pemansik Pengelikun Jalai Alun Malaysia (MIROS) 2011.
Bepelasarka pansik sebaka, ku iya, peratus penusah aksiden ti nyadi bepun ari gaya jalai alun semina 13.2 peratus aja.
“Aku pechaya, peratus penusah aksiden ti bepun ari gaya jalai alun ulih dikurang laban diatu kitai udah bisi Jalai Besai Pan Borneo ti meruan pengudah suah diseleti enggau chakah digaga.
“Nangkan nya, penusah aksiden ketegal penanggul teknikal entukar semina 6.6 peratus aja,” ku iya.
Chong mansutka jaku nya rambau Program Pengelikun Jalai Alum Serimbai Taun Baru China (TBC) 2024 begulai enggau Opis Pengangkut Jalai (JPJ) Sarawak ba Terminal Bas Kuching Sentral ditu, sehari tu.
Chairman Parti Tindakan Demokratik (DAP) Sarawak nya madah, program nya diatur serimbai pengerami TBC 2024 dikena nentu penguna jalai alun ngasika atur teknikal enggau pengelikun entukar.
Pia mega, ku iya, nya sebengkah inisiatif dikena ngajar bala deriba enggau penguna jalai alun ngambi seruran ngasika undang-undang jalai alun kelebih agi maya musin pengerami.
“Kelimpah bejalaika pengawa meresa perengka pengangkut mensia mayuh, JPJ deka bejalaika pengawa meresa ai kemi ngagai semua deriba bas dikena ngurang penusah aksiden.
“Nya alai, penguna dilalau bejimat maya deriba sereta ngasika atur jalai alun ti udah ditetap dikena ngurang penusah aksiden enggau kes pemarai,” terang iya.






