KUCHING: Bintulu Port Holding Berhad (BPHB) mantai dividen sepenyampau RM69 juta tauka 15 sen sesaham ngagai bala pengempu saham berebak ari penegap pekara wang sida naka 31 Disember 2024.
Pekara nya dibantai rambau Aum Besai Ninting Taun (AGM) Ke-29 serikat nya ditu, kemari ti ngemataka semua resolusyen dikemendar bala pengempu saham.
Tuai Pegawai Eksekutif (CEO) BPHB, Ruslan Abdul Ghani madah, BPHB ngerikod asil raban sepenyampau RM888.47 juta iya nya nambah 8.13 peratus dibanding taun sebedau nya.
Iya madah, penyampau kargo ti diatur mega nambah ngagai 51.94 juta tan metrik kelimpah netap kelai baru ungkup penyulut operasyen sida.
“Trafik vesel dirikod pemadu tinggi iya nya 8,026 kangau ti terus negap penuduk BPHB nyadi hab pengangkut maritim ti beguna amat di rantau tu.
“Penyulut tu disungkak atur operasyen ti efisyen, pengawa beranak puku ba digitalisasyen enggau infrastruktur penyangkal kapal tu,” ku iya.
Ruslan mansutka jaku nya rambau aum pemberita pengudah ngulu AGM BPHB ditu, sehari tu.
Nangkan nya, iya madah, BPHB chakah bejalaika bemacham inisiatif infrastruktur enggau pengerembai strategik nyengkaum Projek Borneo Oil and Gas Supply Base (BOGSB) ti nyadi pugu besai ba pengawa nempa Sarawak nyadi hab pengangkut kuasa luar serantau.
