Penyelai penatai asal Etnik Kenyah

ETNIK Kenyah entara etnik dominan raban bansa Orang Ulu di Sarawak kelimpah ari etnik Kayan ti ngembuan mayuh gaya ti sebaka enggau sida.

Kelimpah ari dikelala enggau nama etnik Kenyah, sida mega digelar Highland Kenyah enggau Usun Apau Kenyah belalauka sekeda karang pemansik antropologi.

Taja pia, bisi sekeda teori ari orang bepenau ba antropologi ngelansa baka ni nama Kenyah tu dikena, bepelasarka sekeda penerang ditibak ari sebengkah Portal We are Dayakia.com.

Kenu ku teori Okushima (2008), nama Kenyah diambi ari leka jaku Keny’yeah, Ken’yah, Ken‘heah, ke alai genteran jaku ti asal ari jaku raban etnik Ga’ay ti ngemai reti tanah kampung tauka pinggir menua.

Teori Inoue (2000) enggau Soriente (2003) meri reti jaku Kenyah tu belalauka seraban komuniti ti idup di menua ulu Apau Kayan enggau Usun Apau seraya teori Cleary enggau Eaton (1993), nama Kenyah tu belalauka langkar tubuh komuniti Kenyah iya nya tegap, sikar, isi begumpal tang kurus, kulis alus sereta nadai selitan sakit kulit.

NYELAI… Pending ti ditebuk deka ditating ngena antin temaga dataika pending lanjut ti dikumbai bansa Kenyah sebagi ari pemajik sida ke indu.

Enti diperati ari pengelain etnik mit, etnik Kenyah mega bisi sekeda etnik mit ti di baruh sida lalu tu ngasuh etnik sida bisi pengelebih enggau penyelai sida empu.

Raban etnik mit minoriti tu nyengkaum Uma Bakah, Lepo Anan, Lepo Tau, Lepu Jalan, Lepo’ Tepu, Uma Kelap, Badeng, Jamok, Lepo Aga’, Bakung, Lebu Kulit, Uma Alim, Uma Timai, Uma Lasan, Lepo Ma-ut, Chebop, Lepo Ke’, Lepo Ngao, Ngurek, Kiput, Long Ulai, Long Tikan, Long Sabatu, Lepo Ga, Lep Dikan enggau Lepo Pua.

Nitih ku ripot penyampau tubuh rayat Sarawak ba taun 2012, lebih kurang 30,000 etnik Kenyah lalu sida tu tebal agi diau ba kandang menua ulu Baram baka Long Selaan, Long Moh, Long Anap, Long Mekaba, Long Jeeh, Long Belaong, Long San, Long Silat, Long Tungan enggau ke bukai.

Kelimpah ari nya, bisi mega etnik Kenyah ti diau di kandang menua semak sungai baka di Sungai Senep, Long Dungan, Long Busang, Long Beyak di Bintulu sereta enda ngelaung genturung pengentap baru pendiau di Sungai Asap, Long Bulan, Long Jawe di Belaga.

Ketegal bisi kaul asal penatai etnik Kenyah ari Kalimantan Timur, nya kebuah enda ulih dikenggai etnik tu mega mayuh diau di kandang menua sepiak nyin baka Apau Kayan, Bahau (Bau), Benua Lama enggau Benua Baru ti nyadi wilayah Mahakam di Kalimantan Timur diatu.

NEMPA KAUL… Raban bansa Kenyah diarika Kelab Main Asal Kenyah Uma Baha rambau pengawa Ngerandang Jalai Gawai Dayak Renggat Nasional 2019 di Bintulu nyerumba Gawai Dayak taun tu tadi.

Wilayah nya mega pegari agi dikelala bumi Kenyah laban semua daya idup bansa Kenyah baka ukir enggau langkar rumah bansa nya meruan dijaga nyentuk sehari tu.

Nampung serak jerita sida ke tuai, asal penatai bansa Kenyah ari Dataran Tinggi Usun Apau kenyau ari taun 1400-1700 masihi agi seraya penerang madahka bansa tu berengkah bebagi tubuh ngagai sekeda etnik mit Kenyah urung taun 1400-1600 masihi.

Lebuh jeman Usun Apau dipangka perang enggau pangan diri, etnik Kenyah baka etnik ke bukai di Sarawak ti diau di Usun Apau bela mindah ngagai serap menua Borneo jeman nya.

Angkat mindah bebala mayuh tang berenggat tu nyadi bepuluh taun pengelama lalu jeman tu mih dipelaba etnik Kenyah diau mendam di kandang menua Long Sebatu, Long Akah, Long Ulai, Long Kaput enggau Long Pasong.

Udah nya sida ti mindah ari Bukit Burak nirika genturung pendiau di kandang menua baka Lepo Ka’aung, Lepo Gak, Lapo Tau, Lepo Ayak sereta sekeda kandang menua di Baram enggau Sungai Tinjar.

KELAI BANSA… Sape entara kereban muzik asal raban bansa Orang Ulu nyengkaum Etnik Kenyah.

Enti ditimpai ari sukut jaku, etnik Kenyah bisi jaku sida empu lalu meruan nyadika batang jaku dikena sida berandau nyentuk diatu.

Jaku Kenyah tu tau disengkaum di baruh rumpun jaku Austronesian, Malayo-Polynesian, North Borneo, North Sarawakan, Kayan-Kenyah enggau Kenyah.

Pengaya jaku Kenyah mega bepanggai ba chara nyebut (dialek) ti mayuh macham baka chara sebut Badeng, Bakung, Lepo’ Bem, Lepo’ Ke, Lepo’ Kuda, Lepo’ Maut, Lepo’ Ndang, Lepo’ Tau, Lepo’ Tepu’, Uma’ Jalan enggau Uma’ Tukung.

Ari sukut pengarap, enti suda tebal agi etnik Kenyah megai pengawa lama ti dikumbai Bungan Malan Peselong Luan.

Pengudah injil datai enggau dikerembai ba Bumi Kenyalang tu, mayuh sida megai pengarap Kristian nyadika lalau enggau tenggau ba pengidup sida besehari sehari.

CHUKUP LANDIK… Ba’ tauka Bening dikena nyandik anak mit digaga ari bila wi ti dianyam sereta dilagu ngena leka manik ti ditusuk alus disebut Ba’ Aban tauka Bening Aban, nitihka motif enggau simbol, ti nunjukka peninggi pangkat anak mit enggau indai iya sereta penempa anak mit nya.

Taja pia, etnik Kenyah agi ngintu meruan semua adat enggau daya idup chara lama sida asal enda limpang tauka besibil ari ajar injil ti dititih sida diatu.

Kelimpah ari pegari nama nyadi bujang berani bekayauka pala munsuh jeman perang wilayah lebuh di Usun Apau tauka di wilayah Sarawak tu empu, sida mega tebilang enggau asil pengelandik jari.

Etnik Kenyah ngembuan penau enggau pengelandik nengkebang leka manik ditusukka gelang tauka Gelam Lengen, marik tauka Ino’ Bengen, Uleng Kabo tauka Sabo enggau Tapung Se’ sereta Belanyat Ino’.

Kelimpah ari nya, sida chukup bagas ngiga utai tumbuh ditengkebang nyadika kereban ti tau dikena beridup baka ari kayu kampung, wi enggau buluh.

Sida mega bisi kereban muzik diri empu baka Sape, Keluri enggau Keringut ti nyauka baka gamal seruling.

Nya alai nadai orang ulih ngenggaika tanda asal etnik Kenyah ti ayun lundai baka tanda Datun Julud ti mega kelai sebagi ari hari besai diintu raban bansa tu.

KERING… Gaya pendiau sida ke lelaki bansa Kenyah chukup ngepan enggau senyata nyadi bujang berani.