Perais rumah, kelai basa ngagai Pandelela

KUCHING: Ratu Terejun Menua, Pandalela Rinong nerima sebuah unit rumah (apartment) ari Tenaga Stabil Sdn Bhd laban ti udah mujur nempa penyulut dalam lumba nya maya Lumba Olimpik Rio 2016 suba.

Kepala Menteri Datuk Patinggi Abang Johari Tun Openg madahka penyulut Pandelela ba main terejun nyentuk ngagai tikas ti pemadu tinggi endang patut diberi tanda basa.

“Pandelela bisi juluk ati ti nyemetak deka mujur dalam lumba ti dipasuk iya.

“Empas ari nya, iya mujur nempa nama ngagai tikas pemadu tinggi ti ngujungka iya diberi sebuah unit rumah (apartment) di Blok Pandalela ba P’Residence ditu,” ku iya.

Abang Johari bejaku munyi nya lebuh bejadika Blok Pandalela di P’Residence di Batu Kawa ditu, kemari.

Ku iya, P’Residence ti digaga Tenaga Stabil Sdn Bhd tu ngembuan 864 buah unit rumah apartment ti nyamai endur diau.

“Pemansang kandang palan tu nyadi kelai perengkaguna ti moden sereta narit ati temuai ari menua luar nyuwa palan tu, kelimpah ti dampih ari palan dagang temuai di Bau (Bau Tourism).

“Sida pemeli tau ngaga apartment tu nyadi palan disuwa ti dikerindu bala temuai laban ulih mai ruang bilik sida diau sekali dalam rumah banding enggau diau ba hotel,” ku iya.

Taja pia, ku iya dalam nguji deka ngubah mayuh pekara pemansang di menua iya mai rayat sama ngubah ulah ti enda manah baka bebuaika uras sengapa endur.

Iya mega, ngarapka P’Residence deka nyadi palan ti interaktif dituju penemuai laban palan nya nyendiaka perengkaguna ti engkeman nitihka gaya pengidup kemaya hari.

Nangkan nya, Pandalela lebuh bejaku madahka diri berasai temegah diberi sebuah unit rumah apartment dia.

“Tu asil penyulut enggau pengeransing aku teulihka midul engkeraju maya Lumba Olimpik Rio maya taun 2016.

“Ngagai sida ba luar, anang putus pengarap nyapai juluk ati lalu pechaya ngagai diri empu ngambika ulih nyapai utai ti dikedeka,” ku iya.

Sama bisi datai Menteri Kaunsil Kandang Menua enggau Pengawa Berumah Datuk Sri Prof Sim Kui Hian, Menteri Muda Nembiak enggau Lumba Datuk Snowdan Lawan enggau ke bukai.