KUCHING: Sarawak Metro Sdn Bhd (Sarawak Metro) bisi peluang mandang pemansang Projek Sistem Pengangkut Mengeri Kuching (KUTS) ngagai diligit Perintah Perak dikena mekuh pengawa bekunsi penemu bekaul pemansang pengangkut mensia mayuh ti moden enggau kurang karbon.

Diligit nya betuai ke Kaban Kaunsil Aum Perintah Nengeri (EXCO) Perak ti mega Chairman Komiti Dagang Temuai, Industri, Pengawa Meranak Puku enggau Pemansang Koridor, Loh Sze Yee.

Sarawak Metro madah, diligit nya udah diberi penerang bekaul pejalai Projek KUTS ba penemuai gawa ngagai Menteri Pengangkut, Datuk Seti Lee Kim Shin ba opis iya.

Ku iya, ba penemuai nya, diligit Perintah Perak nya mega madah ke minat nemu silik inisiatif munas karbon pengangkut mensia mayuh ba Sarawak kelebih agi nengah Projek KUTS.

Berebak enggau nya, diligit mega nyerangkung pengari Invest Perak mega bepeluang ngabas Fasiliti Ngelekat Transit Aliran Autonomi Kuching (KAAF) di Demak Laut ditu.

“Lebuh ba KAAF, diligit nya mega bepeluang nepan unit prototaip entukar Transit Aliran Autonomi (ART).

“Pia mega, sida nerima penerang bekaul perambu ngelekat sekeda kereban ART bekuasa hidrogen,” ku iya.

Ke rikod, fasiliti nya dipejalai kunteriktor Pakej Sistem 1 Projek KUTS, iya nya siti serikat begulai nyengkaum ari EPR Sdn Bhd, Mobilus Sdn Bhd enggau Global Rail Sdn Bhd.

Sarawak Metro nya siti dagang ti dikembuan Sekretari Pekara Wang Sarawak seraya diberi pengandal ari Perintah Sarawak ngambi ngemansang perengka pengangkut mensia mayuh ti moden nengah projek KUTS.

Nya mega pengatur enggau pemiki Projek KUTS ti dikemansang begulai iya nya Renggat Keterubah nyerangkung pemansang tiga arung: Arung Biru ari Rembus di Kota Samarahan ke Hikmah Exchange ba mngeri; Arung Mirah ari Kuching Sentral ke Pending; enggau Arung Gadung ari Pending ke Damai.

Pugu ba Projek KUTS iya nya ngelala entukar ART ngena kuasa hidrogen. Entukar ART deka beoperasyen ba arung khas enggau nadai bekunsi arung enggau penguna jalai bukai. – NUR HAZIRAH SHUKUR