Perambu besai pemansang Sri Aman udah dikeaum

KUCHING: Perintah Sarawak komited nyendiaka infrastruktur dikena ngemansangka sitak Sri Aman nyengkaum Simanggang.

Kepala Menteri Datuk Patinggi Abang Juhari Tun Openg madah, bulan nyin kemari iya udah ngatur aum begulai enggau piak Residen Bagi Menua Sri Aman Simanggang enggau pengari bukai berunding pasal perambu besai dikena ngemansangka sitak nya.

“Piak sida udah mantai tauka bejurai ngagai aku senentang pelin besai ti diperambu ungkup Mengeri Sri Aman lalu madah pasal pekara ti patut dikemansang.

“Dalam aum nya, aku udah ngubah mimit pelin sida laban kitai deka ngemanah jalai besai nyengkaum sitak tebing sungai Simanggang, Sri Aman,” ku Abang Johari.

Iya mansutka jaku nya rambau Pengerami Aidilfitri Anak Perantau Melayu Simanggang 2019, di Dewan Suarah Kuching, kemari.

Datuk Patinggi Abang Johari Tun Openg
FOTO: NADIM BOKHARI

Abang Johari madah, pelin besai nya agi ngena siti jalai aja.

“Kelebih agi ba sitak astana jalai entara rumah residen, balai komuniti enggau begunan bukai.

“Aku ngubah pelin nya enggau bejalaika projek ngaga jalai begembar baka ba Kuching lalu jalai tu deka digaga nyentuk ba sitak kedai enggau tebing sungai (waterfront) deka ditambah nyengkaum sitak genturung pendiau kita,” ku iya nambah.

Nangkanka nya ku Abang Johari, pekara tu nyadi siti penambah ngagai pelin besai lalu deka dipasuk lebuh bejurahka agih belanja ungkup taun dudi.

Iya mega madah, kitai deka ngaga jalai pesisir ari sitak Lingga ngagai Betong lalu kitai deka ngembuan penyambung jalai pesisir dalam timpuh tiga ngagai enam taun ke deka datai.

“Pelin tu mega nyengkaum sitak Sebuyau, Batang Kerian enggau Batang Saribas ke deka digaga sebuah jematan disambung nyentuk ngagai Bintulu.

“Kitai mega deka ngemansangka palan gadung ti dipejalai ba Sri Aman, Simanggang,” ku iya nerang.

Ngelansa pekara bukai, iya madah perambu pasal Simanggang nyadi sebagi ari Mengeri Sri Aman deka dibai ngagai renggat Parlimen.

“Kitai deka berundingka perambu nya nya lalu aku ngarapka kaban Parlimen setuju pasal pekara tu,” ku iya.

Iya ngelalau komuniti Melayu enggau raban bansa bukai ngambi seruran seati berundingka pemansang ba sitak sida,

“Perintah ti diketuaika aku deka seruran mantu rayat lebuh ngangkatka sitak sida.

“RM1 juta udah diagih lalu kitai deka beserakup ungkup pemansnag anak enggau uchu kitai.

“Jaga kaul serakup kitai ngambika pemansang ulih dipejalai nitihka pelin kitai,” ku Abang Johari madah nyemetak.

Suara Sarawak