SELANGAU: Bala apai indai kelebih agi ba kandang menua ulu diperansang meri perati pelajar jaku English ngagai bala anak sida dikena ngangkat tikas pelajar sida.
Menteri ba Opis Premier Sarawak, Datuk Sri John Sikie Tayai madah, apai indai patut ngena peluang diberi perintah laban nadai sekat ngena jaku English ba nengeri tu.
“Kitai (ba Sarawak) nadai ditagang ngena jaku English kelimpah nemu ngena jaku Melayu.
“Tu meh peluang kitai (peranak menua ulu) laban Perintah Gempung Parti Sarawak (GPS) dekaka anak kita besemekih enggau orang ba tikas antarabansa,” ku iya.
Sikie nibarka jaku peransang nya lebuh Pengawa Bejadika Jalai Semin enggau Pili Bomba ba Rumah Galan ditu ensanus.
Iya madah baru, bala anak nya ila deka ngemegahka apai indai sida lebuh mujur nembuka pelajar ba tikas tinggi lalu nyadi mensia ti menyana dudi hari.
Berebak enggau nya, Sikie mega nyuaka Setipikit Chiri Tuai Komuniti ngagai Tuai Rumah Galan Ganggang enggau Setipikit chiri ngagai Penghulu Dom Brok iya nya Penghulu megai sitak Sungai Tau, Sungai Bawang enggau Sungai Kemena.
Dulu ari nya, iya mega udah dipebasa bejadika jalai beperabung ba Sekula Primari (SK) Sungai Tau.
Kaban Kunsil Nengeri (ADUN) Kakus nya mega bisi ngemendarka agih belanja Projek Mit Pemansang Menua Pesisir (MRP) sepenyampau RM30,000 ngagai SK Sungai Tau.
Sama datai Kaban Parlimen Selangau, Edwin Banta enggau Pegawai Pelilih Selangau, Inting Nyami. – EDISI UKAS
