MUKAH: Penyiru Perintah Sarawak ngagai pengelikun rayat terus dibantai lebuh Kaban Kunsil Nengeri (ADUN) Tellian, Royston Valentine lengkas ngabas raban tasah bah di Ulu Baoh, Dalat.

Ku iya, pengawa matau lengkas nya dipejalai dikena nentuka pengelantang enggau pengelikun peranak ti dituntung penusah semampai dijaga kelebih agi lebuh ngaul raban orang nyelai pendiau (OKU), orang tuai enggau nembiak mit.

“Nitih ke penerang, tebal agi raban tasah ditu datai ari raban ti bisi risiko.

“Nya kebuah atur lengkas meseti dipejalai dikena nentuka pengelikun sida tejamin,” ku iya.

Rosyton bejaku munyi nya lebuh dirandau pemberita lebuh ngulu Program Nguntin Buk Pechuma serimbai Kimpin Back To School ditu.

Iya madah, nya penusah bah ti keterubah dirikod di genturung pendiau nya ngujungka empat rumah panjai ampuh.

Berindik ari nya, ku iya, Palan Pengenduh (PPS) dibuka ungkup ngengkah raban tasah nya.

Iya ngelalau peranak Sarawak kelebih agi di Mukah semampai bejimat sepanjai Musin Landas (MTL) ti benung nyadi.

Tampung iya, raban bekuasa deka terus bejalaika pengawa matau nentuka pengelikun enggau pengelantang peranak semampai tejamin. – EDISI UKAS