KUCHING: Sarawak merambu bejalaika program betuchuk vaksin Covid-19 ngagai mensia mayuh ba zon mirah, pia ku Sapit Kepala Menteri Datuk Amar Douglas Uggah Embas.
Uggah madahka pekara tu udah dikenatai ngagai Menteri Besai Tan Sri Muhyiddin Yassin nyerumba pejalai iya ngabas Palan Betuchuk Vaksin Covid-19 ba Stadium Perpaduan, Petra Jaya, ditu tadi.
“Kami ngarapka sida ba Kuala Lumpur deka berundingka pekara tu laban kitai mesti ngerumban pengawa betuchuk vaksin ba zon mirah.
“Kami mega udah madah ngagai iya (Menteri Besai) penyampau vaksin diguna kelebih agi ba zon mirah,” ku Uggah.
Uggah mansutka jaku nya lebuh dirandau maya nyempung Muhyiddin ngabas Palan Betuchuk Vaksin Covid-19 di Stadium Perpaduan, ditu tadi.
