INDUN SILONG
suarasarawak.sv@gmail.com

KUCHING: Perintah Sarawak meransang mensia mayuh beranakka puku enggau ngerandang semua peluang bekaul pemansut ti bisi ba Sarawak.

Premier Sarawak, Datuk Patinggi Tan Sri Abang Johari Tun Openg madahka pekara nya kelebih agi ba sukut ngerandang dagang projek gas masam di Bintulu.

“Aku kala nyebut pekara tu ngagai raban Shell iya nya geologi kitai ngasaika gas nya endang bisi, engka ba sepiak barat Sarawak.

“Taja pia, pekara tu bepanggai ngagai pengawa ngerandang engka ulih dikerembai nyadi sebagi ari pengawa ekonomi tauka enda,” ku iya.

Abang Johari bejaku munyi nya lebuh ditanya pemberita rambau Pengerami Ngelalu Pengabang Hari Raya Shell ba sebuah hotel ditu, kemari.

Ku iya, pekara nya mega bepanggai ngagai teknologi.

“Nyema teknologi nya bisi, reti iya gas nya ulih dikena nyadi siti agi penatai rizab gas menua.

“Tang aku deka bekunsi Shell udah ngerembai ba Sarawak, indu opis Shell di Miri lalu mayuh pengereja pengawa Shell udah mindah ke Miri.

“Nya mai reti Miri deka pulai ngagai Miri sebedau tu (ngerembai baka suba), nyema pengawa huluan betambah mayuh agi ga pengawa hiliran nyadi ba Sarawak ila,” ku iya.

Ba pun taun tu tadi, Abang Johari bisi ngemataka Pengawa Nyain ‘Kontrak peruntukan Kejuruteraan, Perolehan dan Pembinaan (EPC) bagi Kerja-Kerja Pembinaan Struktur Tetap Luar Pesisir untuk Projek Pemampatan F6 VLAP’ ti diempu Sarawak Shell Berhad entara Sarawak Shell Berhad enggau Brooke Holding Sdn Bhd.

Iya lebuh bejaku madahka pekara tu beguna awakka Sarawak ulih nyadi pemain besai dalam industri minyak enggau gas kelebih agi lebuh menua berengkah ngalih ari ‘bahan api fosil’ ngagai penatai ti ulih dikemaru nyengkaum ngurangka karbon.

Iya mega madahka, ungkup nyapai tuju nya, Sarawak enda semina neruska pengawa ngadu kuasa gadung enggau bakih dagang tradisional baka Petronas enggau Shell, tang mega deka ngadu kaul kerejasama enggau pemain industri menua luar.