SPAOH: Perintah sedia ngagihka belanja ungkup perengkaguna sekula kelebih agi kereban diguna ba chara idup baru.
Sapit Kepala Menteri Datuk Amar Douglas Uggah Embas madah, sekula ba menua pesisir udah sedia ngepunka baru pengawa ngajar enggau belajar (PdP) kena 15 Julai tu.
Ku iya, piak sekula udah nyendiaka endur masu jari, hand sanitizer enggau kereban meresa pengangat isi ti chukup, tanda nyaga takah ba sepanjai kaki lima nyengkaum entara mija dalam kelas.
“Ungkup sekula bekenaka plastik endur bebasu jari, nyangka ulih ngena atur ke manah agi baka ngena sinki aluminium enggau nyendiaka ai paip.
“Pekara tu likun enggau teguh agi laban pengawa nagang igi penyakit tu begunaka timpuh panjai.
“Sida mega meseti meli mayuh agi kereban meresa pengangat isi lalu perintah sedia ngagihka belanja ungkup tuju nya,” terang iya.
Uggah ti mega Chairman Komiti Penyangga Penusah Ngenyit Sarawak (JPNS) mansutka jaku nya lebuh bejalai ngabas enggau matau Sekula Sekondari (SMK) Spaoh udah nyikap diri sebedau PdP minggu baru, seharitu tadi.
