Petara agi nyangkung

BINTANGOR: Lima lelaki ngasaika seput sida agi disangkung petara pengudah kerita ditepan sida tepawah ke tisi jalai lebuh nguji nyeliah ari ngelantak pun kayu di Jalan Skim B, ditu, malam tadi.

Ba penusah nyadi urung pukul 10.20 malam nya, kesemua sida beumur entara 20 ngagai 61 taun dipelaba benung ba rantau jalai ari Bintangor nuju ke Sarikei.

Taja pia, dua ari sida nya, beumur 20 enggau 54 taun, bakal ba mua enggau bau.

Berindik ari nya, Ketuai Opis Bomba Bintangor, Nicholas Belulin madahka raban bomba berumban ngesah ngagai endur penusah nyadi pengudah nerima kangau ngenyit urung pukul 10.22 malam.

“Lebuh datai dia, kami meda kerita sida tu udah tepawah ke tisi jalai tang nadai sebarang operasyen dipejalai laban kesemua sida mujur mansutka diri ari kerita.

“Seduai ti bakal dianjung ke Sepital Sarikei nerima perubat,” ku iya madah ngagai pemberita.

Ku iya, piak Bomba mantu ngalihka lumpung kayu ke tisi jalai kelimpah bejalaika pengawa matau nentuka pengelikun ba kandang ngelingi endur penusah nyadi, sereta nentuka jalai ulih ditengah entukar bukai.

“Bepelasarka penerang sida, kesemua sida benung ba rantau jalai ke Sarikei.

“Taja pia lebuh datai ba penusah nyadi, deriba enda tetagangka kerita sebedau ngelantak selumpung kayu ti labuh ba jalai nya.

“Kitai ngelalau sida tu ngaga ripot polis pasal penusah nya,” ku iya.

TEPAWAH… Gaya kerita ti tepawah ke tisi jalai di Jalai Skim B, malam tadi.

Suara Sarawak