BETONG: Raban nembiak lepas SPM enggau STPM dilalau patut betanya silik ngagai pengajar kaunseling enggau sebarang piak ke lebih bepenemu bekaul enggau kus sereta bidang ke deka dipilih ungkup pemaik dudi hari.
Kaban Kunsil Nengeri (ADUN) Engkilili ke mega Kaban Kaunsil Dikearap TEGAS, Dr Johnical Rayong Ngipa madah mayuh nembiak salah pilih kus tauka puntan ngaga pemutus ti pintar ngujungka sekeda sida nya enda teapuska pelajar.
“Chukup sinu, bisi sekeda nya enda ulih besemekih enggau nembiak bukai ke nyulut maya minta pengawa.
“Bekau ari salah pilih kus, ukai semina masau jam enggau duit ringgit tang mega ngujungka sida enda teulihka batang pengawa ti manah,”ku iya.
Iya madah munyi nya rambau bejadika Pro-DR Roadshow 2019 di Dewan Panglima Rentap, ditu kena 31 March tu tadi.
Berebak enggau nya, Dr Rayong ngelalau raban nembiak patut nguna Pro-Dr Roadshow enggau manah.
“Endang utai dikearapka Perintah Sarawak deka nempa mayuh pengereja pengawa digital dikena ngemujur agenda nengeri tu nyadi nengeri mansang manggai taun 2030 nengah Ekonomi Digital.
“Nya alai, anang malu betanya dalam nentuka kuing pengidup diri,” ku iya seraya meri terima kasih ngagai apai indai ke datai nyukung program nya seraya besampika semua nembiak ke ngambi bagi bela ulih nyapai juluk diri dudi hari.
Dulu ari nya, bisi 45 institusyen sereta ejensi nyereta ‘Project Of Dreams Realized (Pro-DR) Roadshow 2019.
Program tu endang eksibisyen ke pemadu besai di Sarawak dikemujurka TEGAS pengelama tiga minggu bejurut diatur dikena mantaika penerang pasal peluang pelajar, latih sereta bantu pelajar ungkup nembiak lepas SPM enggau STPM.
TEGAS mujur ngatur Pro-DR Roadshow tu ninting taun kenyau 2015 lalu taun tu nyadi taun ke-5 program tu udah diatur.
Berebak enggau nya, ku Dr Rayong ba renggat sekula, nembiak meseti ditelebaka enggau pelajar STEM (Sains, Teknologi, Injinir enggau Matematik).
“Apai indai meseti meransang bala anak milih bidang sains laban bidang tu nyendiaka peluang pengawa ke lebih besai jemah ila.
“Raban nembiak patut ngubah runding ti suah ngumbai mata pelajar sains tu tusah.
“Ditau nengah pemansang dalam inovasyen digital, semua penemu enggau penerang ulih digiga nengah google.
“Nya kebuah taun tu, TEGAS bisi mandangka Mini STEM Playground sepanjai eksibisyen awakka nempa pengerindu bala nembiak ngagai bidag STEM,” ku iya.
Sama bisi datai Ketuai Pengatur Pengawa TEGAS, Awangku Merali Pengiran Mohamed enggau bala bukai.
