KUCHING: Serakup Pengintu Pengelantang Dayak Seati Sarawak (PKDBS) diperansang patut ransing agi bejalaika tanggungpengawa besai mantu mensia mayuh di Sarawak lebih agi komuniti Dayak di menua pesisir.
Penyanding Penemu PKDBS Datuk Dr Jerip Susil madah, arapka serakup tu terus chakah ngatur program-program ke ulih mantu nyungkak tikas pengidup komuniti Dayak ba semua sukut nyengkaum ekonomi, rama enggau enggau pekara pelajar.
“Teruska pengawa manah kita, mantu mensia mayuh lebih agi komuniti kitai (Dayak) ke diau di menua pesisir.
“Atur mayuh program ke ulih nyungkak tikas pengidup komuniti Dayak sekalika nya ba sukut ekonomi, rama enggau pekara pelajar,” ku iya ke mega Menteri Muda Perengka Pengangkut.
Iya madah munyi nya rambau bejadika Aum Besai Ninting Taun Serakup Pengintu Pengelantang Dayak Seati Sarawak (PKDBS) ke diatur ba Rumah Jonathan Ugek, Sungai Janting, Bintangor, Sarikei apin lama ke ke udah.
Kaban Kunsil Nengeri (ADUN) Mambong nya mega meri terima kasih ngagai PKDBS laban udah nyiri iya nyadi penyanding penemu serakup.
Dr Jerip dipadu nyadi penyanding penemu PKDBS kenyau ari penumbuh serakup kena 2 Disember 2011 ke dipenyadi ba Kampung Simuati, Ulu Padawan.
Urung 350 iku deligit PKDBS ari selampur Sarawak bisi ngulu pengerami tu ke berambaika jaku ‘Beserakup Begulai Nuju Pemansang’.
Raban deligit ke nyereta aum besai tu datai ari Pampang PKDBS Kuching, Sarikei, Kapit, Sibu, Bintulu, Miri enggau Limbang betuaika Presiden iya, Datuk Joseph Unggu.
Bejaku ba pengerami tu, Joseph Unggu madah meri pengaga ati ngagai semua kaban serakup laban udah mujur nambahka penyampau kaban ba menua diri.
“Naka tu penyampau semua kaban PKDBS ba serata Sarawak bisi 21,750.
“Taun tu, serakup udah ngelancharka Pilot Projek Nanam Nanas di Sungai Janting, Bintangor nengah Koperasyen Agrobiz Jaya Sdn Bhd.
“Gerempung kerejasama (koperasyen) tu ditumbuhka 57 iku kaban PKDBS Bintangor ba kebun urung 110 ekar pemesar.
“Asil kebun nanas tu mujur dijual nengah Serikat Athmar Al Barakah Holding di menua Brunei berekat ari buah penemu presiden enggau penyanding penemu serakup tu,” ku Joseph.
