PKP: Diau jenuh ba rumah panjai

SIBU: Peranak rumah panjai ke disekat pemindah ditangkan patut seruran nitihka gerah ari raban penerit adat, ku Romeo Christopher Tegong.
Sekretari Politik Kepala Menteri nya madah, nengah chara nya sida ulih mantu perintah nagang pengerekai COVID-19 ke majak ngirauka ati.
“Kerejasama kita beguna amat dikena mantu perintah ngemujurka juluk nya.
“Pekara ke patut digaga kita muntang aja, terus diau jenuh ba rumah diri lalu anang pansut,” ku iya madah ditu kemari.
Dulu ari nya, Romeo ke mega Ketuai Pampang PBB Bawang Assan sereta bala iya bisi matau palan ngempang jalai tauka ‘Checkpoint’ ba rumah-rumah panjai ke disekat pemindah.
Entara palan ke diempang jalai tu iya nya sitak Penasu, Rantau Panjang enggau Pasai.
Ku iya, nyema bisi begunaka sebarang bantu peranak rumah panjai tau madah ngagai raban penerit adat ke bisi ba palan ngempang jalai ke besemak enggau rumah panjai sida.
“Titihka mih atur nya ungkup seminggu dua tu aja laban maya nya aja kita disekat pemindah. Pasal pemakai enggau ke bukai anang irau laban semua nya bisi disedia. Kita semina diasuh diau jenuh ba rumah diri empu,” ku iya.
Romeo mega nangkan semua peranak rumah panjai ke udah diasuh bekurung terus titihka SOP, diau jenuh ba rumah lalu beri kerejasama ngagai raban penyaga pengelikun ke bisi gawa ngempang jalai ba sitak ke diasuh bekurung.
Lebuh ngelansa pasal pengawa matau nya, Romeo madah, tuju nya laban deka ngabs bala PDRM enggau ATM ke nyadi raban gawa diluan bejalaika pengawa ngempang jalai ba sitak bekurung di Penasu, Rantau Panjai enggau Pasai seraya meri peransang ngagai sida.
“Kelimpah ari nya, aku mega bisi beratika tikas pemereti ati mensia mayuh ba endur diasuh bekurung sekumbang menua Sibu diasuh PKP,” ku iya.
Romeo mega meri puji sereta terima kasih ngagai semua raban polis enggau soldadu ke udah bejalaika pengawa manah ba palan ngempang jalai ba atur bekurung sekumbang timpuh PKP ba Sibu.
“Kitai bela besampika penyadi Covid-19 tu ulih belinsur manah. Sinu beratika peranak rumah panjai ke diempang jalai,” ku Romeo.

Suara Sarawak