PM kelapan: Lepas Mahathir endang Anwar

KUALA LUMPUR: Lebih 90 peratus Ketuai Pampang Parti Keadilan Rakyat (PKR) tauka 198 ari 219 pampang ke berejista nyemetak madah semina keranka Datuk Seri Anwar Ibrahim nukar Tun Dr. Mahathir Mohamad nyadi Menteri Besai (PM) kelapan.

Ketuai Pampang PKR Kangar, Noor Amin Ahmad madah, sukung majoriti tu ningkah penemu enggau peragam ngumbai PKR benung charut sereta pambar.

“Kitai langsung nadai berandauka ketuai bukai, pilih bukai. Lepas Dr Mahathir endang Anwar. Sukung ari bala ketuai pampang tu nunjukka PKR agi kering sereta beserakup dibaruh iring Anwar ti nyadi Presiden parti.

“Tang nyema nanya kami, bala kaban PKR, ari kemari kami sigi deka Anwar nyadi Menteri Besai, tang kami taluk ngagai resolusyen Pakatan Harapan (PH), ” ku iya ba sebengkah aum pemberita ditu, tadi.

Noor Amin madah semua ketuai pampang PKR serata menua dikangau lalu madahka penemu ti nyemetak nyukung iring Anwar ke nyadi Presiden PKR enggau Menteri Besai kelapan.

“Bekau ari semangat tu, kami ngarika 198 ketuai pampang PKR serata menua ngelui 90 peratus dikangau madahka sukung ngagai Anwar ngiring parti lalu neruska agenda reformasyen sereta nyadi kapten besai PH.

“Kami mega bebendar nyukung Anwar awakka ulih ngiring menua enggau nyadi PM kelapan baka ke udah disetuju begulai enggau ketuai PH maya PRU14, Mei taun nyin kemari,” ku iya.

Iya ke mega Kaban Parlimen Kangar taja pia ngaku semua parti sigi bisi sukung ngagai sesiku ketuai.

“Ba aku semua parti bisi sukung ngagai sesiku ketuai, semina lebuh ketuai pampang mantaika sukung tu reti nya nadai bisi laya dalam PKR.

“Sentang Anwar nyadi Menteri Besai udah Dr Mahathir… sigi bisi dikerandau sebedau tu, semina nadai haribulan. Nya alai, aum pemberita sehari tu mandangka nadai sebarang penyarut, iya ke bisi nyangka bebida penemu, tu penerang ke sama,” ku iya.

AUM PEMBERITA…Noor Amin (duduk tengah) begulai enggau ketuai pampang PKR ke bukai ba sebengkah aum pemberita.