KUCHING: Perintah Sarawak mesti berandau enggau raban bekuasa pasal engka Pengawa Bepilih Nengeri (PRN) Ke-12 deka diatur enda lama agi ngambi sida ulih besedia tumu.

Pemikir politik, Prof Datuk Mohd Fadzil Abdul Rahman madah, pekara nya beguna amat nentuka pengawa kimpin enggau pengawa bepilih ulih diatur enggau likun maya pandemik Covid-19 tu.

“Ari sukut politik perintah nengeri engka deka ngelalaika haribulan PRN tang nya tetap mesti dipadah dulu ngagai raban bekuasa dikena nentuka sida udah besedia tumu.

“Pia mega, Komiti Besai Pengawa Bepilih 9SPR) mesti ngaga langkar kereja ke manah pasal chara pemadu manah pengawa bepilih diatur maya igi penyakit tu agi ngerekai,” terang iya, ensana.

Ngelansa silik, iya madahka SPR mesti tetap udah sedia ari diatu laban sebarang pekara tau nyadi sekalika perintah nengeri madah ngagai sida tauka enda.

“Perintah nengeri mesti bisi perambu PRN ti berurun enggau strategik sereta anang nganti lama laban nya pasal rayat.

“Sida mesti merambu enggau manah sereta berurun kelebih agi maya bekimpin,” terang Fadzil.

Nambahka nya ku iya, parti politik dipinta merambu bejalaika kimpin enggau manah laban iya pechayaka penanggul deka nyadi maya nya.

“Kebuah pia laban ba penemu aku, dia mih penanggul nyadi laban mayuh orang begelumu nyentuk nyau enda ingat nitihka Atur Pengawa Standard (SOP) laban sida udah masuk politik enggau bekimpin.

“Kitai mesti ingat bisi tanggung pengawa nentuka nadai orang kena rampit Covid-19 sepanjai pengawa nya,” terang iya.

Iya nyemetak madah, kitai mesti belajar enggau nyeliahka penyadi kes positif baka ke nyadi pengudah PRN Sabah taun nyin kemari.

“Ba Sarawak, siti pekara ke ngasuh kitai lantang ati nya tebal agi peranak ditu udah nerima vaksin,” ku iya nerang.

Ku iya, kitai mesti beratika manah lebuh ngatur PRN tang nya mesti dipejalai laban pengawa bepilih nengeri tu udah lama ditangguh.

“Kitai enda ngenggaika berita ngerimbas pending pasal PRN engka diatur ujung November tauka Dismeber.

“Engka amat pengawa bepilih deka diatur taun tu tang nya bepanggai ngagai pemutus menua sereta penyadi Covid-19 enggau darurat abis timpuh.

“Perintah mega ‘tepekul’ ba penusah besai laban mesti bulih mandat lalu mesti nyaga pengerai enggau pengelikun rayat,” terang iya.

Taja pia ku Fadzil, perintah mesti ngulihka mandat laban mayuh pekara mesti dipejalai kelebih agi pengudah bejuraika Langgur Pemansang Malaysia Lumpar Ke- 12 (RMK-12).

“Enti nadai mandat baru, pedis perintah deka bejalaika perambu pemansang.

“Nya alai, enti PRN diatur taun tu mesti bisi perambu enggau atur ke engkeman bekaul enggau pengawa bekimpin sereta ngundi,” terang iya baru.

Ungkup rikod, Proklamasi Darurat di Sarawak dilanjar nyentyk 2 Februari taun baru pengudah disetuju Seri Paduka Baginda Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah Ibni Almarhum Sultan Haji Ahmad Shah Al-Musta’in Billah kena 29 Ogos tu tadi enggau dipasuk dalam gazet perintah kena 30 Julai tu tadi.