ARTIKEL

BATANG SUKUNG… Sida sebilik kelebih agi apai enggau indai seruran nyukung Boy ngemansangka pengelandik diri ba pengawa beranyam.

Produk bekualiti semampai laku

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

TUSUN KEEMPAT

KETEGAL deka meda pesaka main asal ba pengawa beranyam tu semampai dikerindu enggau dikemeran rebak biak, Alexander anak Bara enda belampung ati ngajar sida ti bisi ati deka belajar beranyam.

Pekara nya ulih dipeda kitai ba tusun sebedau tu lebuh iya naka ulih magi awak diri ngajar sida ti deka mekuh pengawa nya kelimpah ransing belajar pekara baru ari sida ti tebangkar kelebih agi sida ti tuai.

Nyadi ba tusun sekali tu, kitai deka bejuraika pengelandik iya ti rindu agi dikangau Boy ba pengawa beranyam sereta ngerandang dagang ngagai iya empu.

NGERANDANG DAGANG
Lebuh kitai beumur 15 taun suba tauka Pom Tiga, nama pengawa dikereja kitai maya nya suba kini kelimpah ari belajar?

Bisi kini kitai nguji berunding ngemansangka pengelandik diri dikena nyungkak penatai pemisi tambah ngagai diri empu tauka kitai agi bepanggai penuh ba duit belanja ari apai indai?

Dipelaba aku, tebal agi kitai maya nya suba bepanggai penuh ba duit belanja ari apai indai kelimpah rindu bemain aja sereta bedau ngerunding pengidup dudi hari.

Bebida enggau nembiak bukai, Boy maya nya suba udah ngembuan runding bedagang lalu ngena pengelandik beranyam nya iya berengkah bedagangka asil tauka produk anyam diri.

Pengelandik beranyam mujur ngerandang dagang ngagai iya empu berengkah ari umur iya agi 15 taun suba nyentuk sehari tu.

Nya alai, kitai patut bechunto enggau bechuanka Boy laban ba umur ti agi biak bendar tauka agi bau lia iya udah nyadi siku pedagang kraf jari.

Ari nya, iya udah belajar ngiga belanja enggau ngidupka diri empu sereta enda bepanggai penuh ba duit belanja ari apai indai.

Entara produk anyam ti digaga iya baka lanji, baduk tauka tebekang, raga, sintung tauka takin, jagan, chapan, bakul, kantung enggau uyut.

Boy madah, asil ti diulih iya ari pengawa bedagangka produk anyam nya suba disimpan iya dikena nampung pelajar enggau meli barang ti diguna diri.

“Taja pen asil diulih aku ari pengawa bedagangka produk anyam maya nya suba enda tentu besai tang aku temegah ati ulih ngasilka penatai pemisi ari titik peluh nengah pengelandik dikembuan aku empu.

“Aku beterima kasih ngagai Petara laban diberi pengelandik beranyam lalu nengah pengelandik tu meh aku ulih nyungkak penatai pemisi tambah nyentuk sehari tu.

“Kemaya hari tu, kitai bela nemu rega barang majak niki lalu tu balat nating pengidup semua orang tang asil ti diulih aku ari dagang tu ulih mantu ngelempungka tating belanja aku empu kelimpah enda bepanggai penuh ba gaji,” ku iya.

APAI INDAI TIANG SUKUNG
Pengawa Boy ngemansangka pengelandik diri sereta bedagangka produk anyam nya nerima puji enggau sukung penuh ari sida sebilik empu kelebih agi apai enggau indai iya.

Apai iya, Bara anak Barau enggau indai iya, Alai anak Dingin madahka seduai temegah ati meda pengeransing Boy belajar ngiga belanja enggau ngidupka diri empu.

Ku seduai, taja pen iya (Boy) agi biak bendar maya nya suba tang iya tuai ba runding lalu tu ulih dipeda lebuh iya chakah bedagangka asil anyam diri.

“Kami duai ngelala minat iya ba pengawa beranyam sereta enda leju meransang enggau nyukung iya ngemansangka diri ba pengawa tu.

“Pekara tu chukup manah laban iya ulih belajar ngiga belanja enggau ngidupka diri empu jemah sereta enda bepanggai penuh ba orang bukai.

“Nambahka nya, tu ulih ngajar enggau meri peneleba ngagai iya ngelala reti pengidup sereta pemar ngulihka duit kelimpah ngajar iya reti bekelimat.

“Taja pen diatu iya udah bisi batang pengawa kediri empu tang iya agi neruska pengawa dagang produk anyam tu,” ku apai enggau indai iya.

Seduai mega nyukung Boy ngaul pengawa beranyam laban nya siti ari pesaka main asal kitai Iban ti patut ditan lalu ditampung rebak dudi.

Tampung indai iya, chukup jarang meda bala nembiak kemaya hari tu ransing ngemeranka pengawa beranyam.

“Maya agi mit suba, Boy suah amat betanya enggau belajar chara nganyam ari niang menyadi aku, Piah anak Dingin sereta niang aki iya, Bujang anak Suyam enggau Barau anak Ampa,” ku indai Boy.

SEMAMPAI NERIMA TIMBAL MANAH
Ba pengawa ngasilka produk anyam, Boy sigi ngemeratka kualiti enggau kreativiti dikena narit ati bala pemeli.

Nya kebuah asil keranjai jari iya semampai nerima timbal manah ari bala pemeli laban sida tepantup ati meda pemanah, pengemas enggau kualiti produk digaga iya.

Ninting hari, iya majak nerima mayuh peminta nyentuk nyau enda tentu ulih tetangkupka peminta ari bala pemeli kelimpah ngembuan pemeli tetap kediri empu.

Genap kali nerima peminta ari bala pemeli, ku Boy, iya sigi mesan sida liat ati nganti laban iya begunaka timpuh dikena nembuka peminta sida.

“Aku suntuk awak dikena nembuka peminta bala pemeli laban kiruh enggau pangku pengawa diri nyadi Pemantu Pengerai Mensia Mayuh.

“Awak dikena aku nembuka peminta sida iya nya muak ke malam enggau ujung minggu lebuh aku enda gawa tauka maya kemisi.

“Kekadang sinu ga aku meda bala pemeli nganti lama tang aku beterima kasih laban sida chukup meretika gaya tauka situasyen aku.

“Ukai naka nya aja, pemesai, pemar enggau bansa anyam kelebih agi anyam bebuah mega ulih nentu pengelama peminta bala pemeli tembu,” ku tusui Boy.

Pia mega, iya kekadang nyau enda tentu chukup awak dikena belelak sereta suah laun tinduk ketegal deka nembuka peminta bala pemeli.

Nya alai, ku Boy, nya kebuah iya ngaga produk anyam nya bepelasarka peminta bala pemeli aja ketegal penanggul suntuk awak.

Reti nya tadi, enti bisi peminta ari pemeli, nya baru iya ngaga tauka nganyam bansa produk anyam nitihka penteba ti dikedekaka sida.

Baka orang bukai mega, iya bela ngena pelasar media sosial dikena ngelakuka produk diri baka Facebook @Alexander Bara enggau WhatsApp 014-5756618.

Nangkan nya, Boy bela ngengkahka lumur telefon diri genap kali bekunsika produk anyam ba media sosial ngambi sida ti bisi ati deka nguji keranjai jari iya terus napatka iya nengah lumur telefon nya.

PENATAI PEMISI TAMBAH
Ngelansa senentang rega, Boy madah, rega produk anyam iya enda sebaka bepanggai ba bansa produk anyam, pemesai, pemar bansa anyam enggau ti bukai.

“Ambi ke chunto, produk ti dianyam dua tauka anyam tunggal murah agi enti dibanding anyam bebuah laban mar agi digaga sereta begunaka timpuh ti lama agi dikena nembuka produk nya.

“Nangkanka nya, kekadang sekeda bala kaban nyendia perengka kediri empu baka tali kutak lalu ngasuh aku nganyamka sida.

“Tu lain agi ga rega, murah agi laban sida empu ti nyendia perengka ti dikena lalu aku semina nganyamka sida aja.

“Untung ti diulih aku sebulan ari pengawa beranyam tu enda tetap laban nya bepanggai ba pemayuh peminta ari bala pemeli.

“Taja pia, aku beterima kasih laban asil ti diulih aku ari pengawa tu ulih mantu aku bebelika minyak entukar, barang dapur enggau belanja bukai ninting hari lalu bisi mega disimpan,” ku iya.

Berebak enggau nya, iya ngelalau mensia mayuh kelebih agi rebak biak ngena enggau ngemansangka penau tauka pengelandik sida dikena ngasilka penatai pemisi tambah.

Kemaya hari tu, ku iya, rega barang majak niki lalu kitai enda ulih bepanggai penuh ba gaji ninting bulan aja lalu nya kebuah beguna bendar kitai ngiga penatai pemisi tambah.

Iya madah, siti ari nya nengah pengawa ngemansangka pengelandik diri empu sekali ke ba pengawa beranyam, nyumai, bejait, ngaga kuie enggau ti bukai.

“Kita patut bechunto enggau bechuanka aku, aku bisi pengelandik beranyam lalu aku ngena pengelandik tu dikena nyungkak penatai pemisi tambah.

“Pemadu beguna iya nya kitai meseti bisi niat enggau minat deka ngereja pengawa tu ngambika kitai ngereja pengawa tu enggau ati lantang sereta enda mejal diri empu.

“Tang enti nadai niat enggau minat, nya ti ngasuh orang jampat mantul ngereja pengawa tu sereta enda ulih beretan lama,” ku Boy.

TEPANTUP ATI… Siku pemeli tepantup ati meda pemanah enggau pengemas produk anyam Boy ti bisi kualiti.
GAGA… Siku ati gagit enggau gaga ati meli bakul ti digaga Boy.
TERIMA KASIH… Bakih sama gawa pen bela meli produk anyam Boy.
TEMEGAH… Boy temegah mantaika sekeda asil keranjai jari tauka produk anyam iya.
MANAH… Boy ngema siti ari uyut ti digaga iya empu.

BERITA LAIN

Dua pendam lama di Song disengkubang

SONG: Dua pendam Iban ditu udah disengkubang orang nadai tanggungpengawa ba penusah diripot nyadi kena 20 enggau 22 Mei tu tadi. Tuai Polis Pelilih Song,

Kaul komuniti Dayak meruan teguh

LUNDU: Penyerakup komuniti Dayak diatu chukup teguh taja ari bemacham raban etnik, ku Sapit Premier, Datuk Amar Douglas Uggah Embas. Iya ti temegah beratika pekara

BERITA TERBARU