Program Allianz Kampungku ke penabat penusah ngenyit

KUCHING: Serakup Dayak Response Team tauka DART chakah ngatur Kimpin Nyeliahka Tasah Angus ngaul kerejasama rat enggau Pos Malaysia Berhad ngaduka insuran Allianz Kampungku.

Pengari DART Tajem Sinok madahka Allianz Kampungku nyediaka pampas RM10,000 enggau bayar premium RM75 setaun.

“Kami sebuat ti ngatur kimpin tu endang nadai tuju bukai kelimpah ari mai pemaik ngagai mensia mayuh kelebih agi sida ke diau ba rumah panjai di menua pesisir.

“Nengah kimpin tu mega kitai ngarap ulih muka runding enggau matak raban diselinting tu sedarka pemesai reti tuju enggau juluk pengawa dipejalaika kami sebuat,” ku Tajem ngelansa lebuh dirandau Suara Sarawak.

Nya alai ku iya, pekara pemadu beguna diatu rayat renggat baruh nemu reti, penerang silik enggau pemaik deka diulih ari bebelika skim insuran tu.

NERANG SILIK… Tajem (kiba) ngarika DART berandau enggau Uggah (kanan) pasal pejalai kimpin enggau program diatur sida.

Sida ti bejalaika kimpin tu mega endang nadai nerima sukung belanja ari sebarang piak tang naka ulih gawa laban dibai ati keran ngenatika nasip sida ti tasah dituntung penusah karam di darat majak nyadi, ku iya.

Berindik ari nya sida andal enggau ngarapka ejensi enggau opis bekaul besaup ngelempungka tating belanja pejalai kimpin ngelawa raban diselinting tu.

“Nya alai sehari tu (ensanus) kami ngatur pejalai nemuai meri basa ngagai Sapit Kepala Menteri Sarawak, Datuk Amar Douglas Uggah Embas ba opis iya ditu.

“Tuju pejalai kami endang deka minta sanding penemu enggau saup belanja ari iya kelimpah nerang pasal pengawa diatur bala kami ngintu pengelantang kelebih agi peranak rumah panjai.

“Ngenang pasal belanja ti dipinta raban DART dikena bebelika kereban enggau perengka bejalaika kimpin baka laptop enggau portable speaker, LCD projector, skrin enggau stand, tali karan tambah 10 meter pemanjai enggau laser pointer.

GAWAKA PENGELANTANG… Tajem nerang ba mua mayuh pasal Program Allianz Kampungku beserimbai enggau Kimpin Nyeliahka Tasah Angus ba Rumah Kelimbang di Penyulok Ulu Layar kena 12 Ogos tu tadi.

“Kami mega bisi nganjung peminta belanja ngatur kimpin tu ngagai Menteri Utiliti Sarawak Datuk Sri Dr. Stephen Rundi Utom,” ku Tajem nerang tuju penemuai sida.

Sama datai nemuai meri basa Menijar Pos Malaysia Berhad Sawai Bajing enggau Eksekutif Makit Serikat Insurans Allianz (M) Berhad Vera Phang Lee Ping disempulang bala bukai.

Ku iya, kimpin naka diatu nerima timbal chukup manah ke alai mayuh tuai rumah ngempung penemu nembiak redak sida meli insuran Allianz Kampungku tu.

Antara rumah panjai ti udah ngelempaika pengandal ngagai skim insuran tu iya nya Rumah Kelimbang di Penyulok Ulu Layar, Rumah Laka Matong di Punggu Tinting enggau Rumah Alin Ngadan di Begumbang Ulu Layar.

“Kami mega nerima sukung ari bala ketuai raban bansa nyengkaum Penghulu Sela Entalang ari Rumah Kelimbang, Penyulok Ulu Layar ti udah meli insuran tu.

KE PENABAT… Tuai Rumah Laka Matong ari Punggu Tinting nguluka sida serumah meri insuran dikena nyendiaka diri napi sebarang penusah ngenyit.

“Berindik ari pemanah sukung tu, kami ngarapka mayuh agi bala bukai deka nunda enggau nitihka singkang sida ti udah dulu ngerandang jalai nuju pemaik,” ku iya madah nyemetak.

Beratika statistik rumah angus berengkah ari taun 2015 nyentuk diatu di Sarawak majak nambah ke alai taun 2015 ngerikod (18 kes), 2016 (20), 2017 (26) enggau 2018 (24) sereta taun 2019 naka 31 Julai tu tadi udah ngerikod 12 kes.

Nitih ku penerang ari Opis Bomba Sarawak, tebal agi pun penusah angus rumah kelebih agi rumah panjai iya nya 70 peratus bepun ari sut tali karan, 20 peratus ari dapur enggau LPG enggau 10 peratus ke bukai.

“Sedarka pemesai guna insuran dikena ngintu pengelantang sida ti dituntung penusah ngenyit, Program Allianz Kampungku ditumbuh.

“Pelin tu nyendiaka bayar pampas penyampau RM10,000 ba penusah angus enggau penusah ngenyit bukai baka begunan enggau ruang bilik.

“Bantu ngenyit mungkur penusah angus, bah enggau biau balai tauka ba sebagi ari pengerugi deka nerima pampas RM1,000.

“Pia mega enti bisi penusah bebadi nyawa, tachat seumur idup tauka belanja rabat (siku ti kena bungkur insuran tauka siku ari sida sebilik) dibayar RM1,000,” ku iya nerang.

Penerang silik pasal kimpin enggau program tu tau betanya ngagai bala kaban ngarika DART ti udah dipadu gawa ba bagi menua sida empu.

Sida ti udah dilempaika tanggungpengawa ngemujurka pejalai kimpin tu iya nya Areh enggau Tajem (Betong), Jamal Tedong enggau Dana Empading (Pakan) enggau raban SDGA diketuaika Thwaites Langgak (Bintulu enggau Kapit).

Lady Diana deka ngetuaika pengawa di Gedong, Lit Nyuin (Gua Sri Aman), Olime enggau Gilbert Gaong (Bukit Seri Pakan), Tuai Rumah Dennis Sungkok (Kampung Stampin), Bonnie Langkop (Sri Aman) enggau Micheal Mamat (Miri).

Raban DART nesau semua kitai kelebih agi ke diau di rumah panjai meri sukung tegut ngagai program enggau pejalai kimpin tu pulaika pemaik begulai sereta nyadi penabat penusah ngenyit dudi hari.

Suara Sarawak