Program diatur PIE mujur

ENGKILILI: Palan Internet Engkilili (PIE) mujur ngatur Program Hari Begulai Enggau Mensia Mayuh bepalan premis nya empu nya empu, apin lama ke udah.

Program tu dikemujur nengah kerejasama enggau Palan Internet Lubok Antu enggau Palan Internet Spaoh.

Pegawai bomba kanan 1 Balai Bomba Sri Aman, Bangga Baie bisi dikangau datai ngulu program tu kelimpah bala ketuai raban bansa ari Engkilili enggau Skim Skrang.

Sama datai PB Awang Azdwan Awang Sahari enggau PBB Karl Elliot Lawrence sereta tiga iku kaban volunteer diuluka Nancy Rangkong.

Tuju program tu dikena bekunsi penemu enggau bala mayuh lebih agi peranak rumah panjai pasal chara nyeliah penusah angus.

Nyerumba program tu mega, Bangga bisi meri licha ti berambaika jaku ‘Nagang Penusah Angus Rumah Panjai’.

Berebak enggau nya, aktiviti bukai bisi diatur iya nya meri licha pasal Myfreeview ti dikenataika Menijar PIE, Slyivia Geran.

Myfreeview deka berengkah dipejalaika ba selampur menua kena 30 September 2019.

NYADI PENGINGAT…Bangga begambar bebala mayuh enggau bala temuai dipebasa pengudah tembu pengawa nya.

Suara Sarawak