Program LA 21 nempa komuniti bepenemu

KAPIT: Program Agenda Menua (LA) 21 enggau Servis Pemansang Komuniti ke diatur Opis Kaunsil Kapit (MDK) dua hari berunggu udah mujur meri pemaik ngagai peranak Rumah Sekudan Abor, Sungai Pelagus ditu apin lama ke udah.

Ba hari keterubah program dipungka pengawa beripai ngupas kandang ngelingi rumah panjai ditangkan program randau opis perintah baka Opis Pengerai, Opis Bomba, Opis Betanam Betupi.

Operasyen muru nyamuk tauka ‘fogging’ mega bisi dipejalai nyerumba atur program sehari nya.

Program randau begulai enggau peranak rumah panjai tu dikearap ulih meri sanding penemu ngagai sida kelebih agi sentang bakani chara nagang enggau nyeliah penusah angus.

Batang randau bukai bisi dibai baka pengawa nyaga rampa menua kelebih agi pemeresi kandang rumah panjai nengah program LA 21 tu.

TANDA BASA… Nyabong nerima tanda kelai ari Philimon Nuing tanda bejadike Program Lokal Agenda 21 ba Rumah Sekudan tu tadi.

Datai ba hari kedua, sida serumah dibai nyereta pengawa begagaka asil pengelandik jari baka buriek dientudi pekit ungkup nembiak mit.

Nyadika kelai program mujur diatur nengah pengawa nanam paung buah muakka lemai ti udah dipenyadi Kaban Kunsil Nengeri (Adun) Pelagus, Wilson Nyabong Ijang.

Lebuh nibarka jaku pengelalu, Ketuai Kunsil Opis Pelilih Menua Kapit, Datuk Philimon Nuing madahka MDK deka seruran ngatur pemansang komuniti.

Ku iya, pemansang komuniti endang pekara dikemerat ba rumah panjai di ulu sungai nentuka sida disikap ngena penemu pasal pekara rama, pengerai, ekonomi, pengelikun, pelajar, pemansang insfrastruktur enggau pemesai guna pemeresi kandang endur diau sereta pemansang nembiak.

“Program tu mega sebagi ari chara dikena peranak rumah panjai begulai enggau bala pengari rayat awakka sida nemu penerang pasal polisi perintah ke diatu,” ku iya nerang.

Program LA 21 tu mega deka diatur ba Zon Baleh ba Rumah Inguh, Sungai Paku lalu ba Zon Murum deka diatur ba Uma Nyaving, Sungai Asap Belaga.

Ba taun ke udah, MDK udah mujur ngatur empat program ke sebaka ba Rumah Impang ba Sungai Pila, Rumah Musin Anyok ba Sungai Iran, Rumah Bubut ba Sungai Ibau enggau Rumah Jalaba Nanga Miaw.

MEMANAH… Raban indu Rumah Sekudan mantaika asil pengelandik jari kain buriek sida rambau atur program LA 21.