KUCHING: Program nikah bebala mayuh manah dikena meransang tikas peridi laki bini ti majak kusut jeman diatu.
Menteri Pemansang Indu, Ruang Bilik enggau Komuniti Datuk Seri Nancy Shukri madah, naka diatu, tikas peridi laki bini rayat menua mayuh udah kusut kenyau lima puluh taun ke udah.
Ku iya, ari 6.7 iku anak ungkup siku indu ba taun 1957 ngagai 1.6 iku anak ba taun 2022.
“Tikas peridi laki bini tu entara ti pemadu baruh kala dirikodka, ukai semina di Sarawak aja tang selampur menua.
“Nya alai, aku andalka program baka tu (nikah bebala mayuh) ulih nambahka penyampau tubuh rayat ari pengada anak mit menua kelebih agi di Sarawak enggau Malaysia,” ku iya.
Nancy bejaku munyi nya rambau aum pemberita pengudah bejadika Program Akad Semarak Ummah tauka Pengerami Nikah Bebala Mayuh di Masegit Darul Hana ditu tadi.






