SARATOK: Program Sada Kenyalang ba Stesyen TV Sarawak (TVS) siti pelasar ti engkeman alai raban artis Iban ngelaku sereta mandang cherita bekaul enggau aktiviti pemadu baru ari sida.
Sekretari Gerempung Anak Seni Iban Malaysia (PASIMA),Isa Lee madah penumbuh slot Sada Kenyalang disema baka siti ‘perais’ pemadu berega diberi perintah Sarawak nuju bala artis ba menua tu.
“Meri tabi puji ngagai perintah Sarawak ke udah mujur bejadika Stesyen TV Sarawak (TVS) lalu nyendiaka siti pelasar khas ungkup artis Iban.
“Siti stesyen TV ke pemadu manah alai artis nerang,nusi sereta bekunsi ke pekara ti bisi bekaul enggau pejalai ‘karier’ sida nuju mensia mayuh nengah palan ti chukup besai baka TVS tu kelimpah ari Stesyen TV1 enggau TV2 ba RTM baka ngelama tu.
“Nya alai, pesan aku ngagai raban artis Iban anang enda besemekih sama ngerebut peluang ke udah dinah ba mua kitai nengah chara lurus,” ku iya ke kala tebilang enggau lagu Tubai Pengerindu ngelansa pasal Program Sada Kenyalang ba TVS tadi.
Nambah nya ku iya, tu mih ke buah artis ari Semenanjung ulih nerima penyampau bayar ti besai sereta bepeluang bulih jereki tambah kelimpah ari batang pengawa tetap nyadi penanyi tauka pengeluar program ba sesebengkah program TV.
“Chukup bisi penimpang ba aku siku enti sema siku-siku penanyi tauka artis nya semina dikelala ari lagu tauka utai ditengkebang iya aja tang enda dikelala batang tubuh.
“Genap iku artis ke diambi nyadi temuai mega tpatut diserenih manah bepelasarka pengelandik, penau enggau pengelebih dikembuan siku-siku.
“Orang ti landik nebah kereban musik, nero,n engkebang leka enggau tiun lagu mega dikumbai artis, nya alai ngarap sida mega bisi diberi peluang dikangau nyadi temuai ba program Sada Kenyalang jemah.
Pia mega,dua iku penanyi tebilang Iban, Embat Lala enggau Jenarino Jeraki bela saum penemu madahka penumbuh program Sada Kenyalang chukup manah sereta beguna ungkup raban artis bansa Dayak tauka Iban lalu meri besai terima kasih nuju perintah Sarawak ketegal pengibuh perintah ke pemar ditapi raban artis ari menua tu ngelama tu.
Program Sada Kenyalang udah berengkah dipanchar keterubah iya kena Hari Enam tu tadi lalu dikemujurka pemberita TVS Steward Dawi.
