KUCHING: Sarawak deka negap pengawa nguasa subjek Sejarah nengah Program Ngelati Pelajar Sarawak (SEEP) dikena nambah penyulut chalun ba peresa Sijil Pelajaran Malaysia (SPM) dudi hari.
Menteri Pelajar, Inovasyen enggau Pemansang Penau, Datuk Seri Roland Sagah Wee Inn madah, nadai program tuisyen khas ungkup subjek nya sebedau tu.
Taja pia ku iya, inisiatif ngemanahka nya dikeandal ulih mantu mayuh agi chalun pas ba subjek nya.
“Sejarah tu entara killing subject ke alai sebedau tu kitai nadai program tuisyen ungkup Sejarah. Enti enda, kitai engka ulih meda mayuh agi chalun SPM ti pas.
“Taja pia, enti berati utai ti nyadi diatu, kitai deka masukka subjek nya ba program SEEP.
“Dikearap taun baru kitai deka ngerikod pemutus ti nyulut agi,” ku iya ba aum media mantaika pemutus SPM 2025, ditu, kemari.
Ngenang pekara nya, ku iya, 27 sekula di Sarawak ngerikod penyampau pas 100 peratus ba SPM 2025, lalu nya semua chalun bulih setipikit nya.
Sagah madah, ari penyampau nya, bisi 19 sekula nya ari sekula menua pesisir ti mandangka nembiak ba menua nya ulih nyulut ba pemutus enti diberi sukung ti chukup.
Iya madah baru, nya mandangka bala nembiak, pengajar enggau sukung mayuh raban endang naka ulih nentuka penyulut ba pelajar ba nengeri tu.
“Tu siti ari penyulut ti ngemegah enggau nyadi pekara ti nyata mandangka pengeransing nembiak enggau pengajar, nyengkaum ba kandang menua pesisir,” ku iya.
Entara sekula ti ngerikod 100 peratus pas iya nya Sekula Sekondari (SMK) Telang Usan, SMK Tutoh Apoh, SMK Temenggong Datuk Lawai Jau, SMK Agama Igan enggau SMK Batang Igan.
Bela pas semua SMK Belawai, SMK Nanga Dap, SMK Balleh, Sekula Seni Malaysia Sarawak, Kolej Datu Patinggi Abang Haji Abdillah sereta SMK Agama Tun Ahmad Zaidi.
Nya nyengkaum SMK Teknik Sejingkat, SMK Merapok, SMK Sundar, SMK Kubong, SMK Agama Miri, SMK Sains Miri enggau Kolej Tun Datu Tuanku Haji Bujang.
Kelimpah ari nya, SMK Agama Sheikh Haji Othman Abdul Wahab, SMK Sains Kuching, SMK Agama Matang 2, SMK Pesantren Abdul Taib Mahmud, SMK Agama Saratok, SMK Agama Sibu, SMK Bawang Assan, SMK St Elizabeth enggau SMK Katibas bulih pemutus ti sama.
Prestasyen SPM 2025 Sarawak nurai Gred Pukul Rata Nengeri (GPN) 4.79 dibanding 4.84 ba taun sebedau nya.
Ari 34,166 chalun sekula Opis Menteri Pelajar (KPM) ti ngambi peresa nya, bisi 31,506 chalun tauka 93.99 peratus bulih setipikit SPM. – SITI NURAIN RATANI
