KUCHING: Perintah Sarawak majak chakah negap atur trafik mengeri dikena mutar penanggul jalai majak sekut berindik ari mengeri deras mansang, penyampau tubuh peranak enggau entukar nambah di nengeri tu.
Menteri Pengangkut Sarawak, Datuk Seri Lee Kim Shin madah, rentayan jalai alun ba mengeri majak diberi perati kelebih agi jalai besai enggau simpang ti sekut ba sekeda mengeri di Sarawak.
Ku iya, belalauka statistik naka ujung taun 2025, Sarawak ngerikod lebih dua juta entukar rejister, tebal agi kerita diri empu enggau motosikal. “Entukar ti majak nambah tu ngujungka rentayan jalai di mengeri mega majak sekut,” ku iya.
Kim Shin nyebut pekara nya lebuh ngetuai ke Aum Komiti Pengatur Trafik Mengeri Sarawak (SUTMaC) Bil.1/2026 ditu, ensanus. Iya madah, penanggul trafik sekut mega majak raya maya jam jalai sekut ba sekeda jalai besai sereta simpang besai, lalu nya tau ngeruga pengelikun ba jalai alun.
Berebak enggau nya, projek infrastruktur ti benung digaga baka Sistem Pengangkut Mengeri Kuching (KUTS) nyadi inisiatif beguna dikena negapka sistem pengangkut mengeri timpuh panjai, tang projek nya engka meri empas enda lama ngagai pejalai trafik sekumbang digaga.
Berindik ari nya, iya madah ke atur trafik ti nemban agi lalu diseraris mayuh ejensi bekaul beguna endar. Ku iya, isu baka kapasiti jalai alun, chara mitigasyen penyekut, atur entepan entukar, ngena sistem lampu trafik, aksiden jalai alun sereta pengawa mitigasi begunaka kerejasama rat semua raban.
Iya mega madah ke SUTMaC ulih nyadi pelasar beguna endar ngempung ejensi perintah, raban bekuasa lokal, operator pengangkut, raban penerit adat enggau ejensi teknikal dikena bekunsi penerang, nyeraris langgur sereta mutar isu ngatur trafik mengeri begulai.
Aum nya mega digulu Residen Bagi Menua enggau pengari sida, pengari raban bekuasa lokal enggau kaunsil mengeri, Opis Kereja Raya (JKR), Opis Pengangkut Darat (JPJ) sereta pengari Opis Pansik enggau Penerit Adat Trafik (JSPT), Indu Opis Polis Kontinjen (IPK) Sarawak, kelimpah ejensi bekaul.
Bela datai, Sapit Menteri Pengangkut Sarawak (Langit enggau Jalai), Datuk Dr. Jerip Susil, Sekretari Mendam Opis Menteri Pengangkut Sarawak (MOTS), Datuk Wong Hee Sieng, Sapit Sekretari Mendam MOTS, Mohamad Lotfi Tuah sereta bala pegawai kanan MOTS.
Berebak enggau nya, Kim Shin mega madah ke ba aum sebedau nya, iya udah ngansak Kaunsil Multimedia Sarawak (SMA) enggau MOTS ngelanggur standard enggau atur malin dikena bejalaika Sistem Lampu Trafik Pintar Sarawak.
“Ari input teknikal ari SMA, Standard enggau Atur Malin Sistem Lampu Trafik Pintar Sarawak udah dikeluar rasmi ngagai opis menteri enggau ejensi bekaul bulan Februari tu,” terang iya.
Ba aum nya, pengari JSPT IPK Sarawak meri penerang pasal statistik penusah bebadi di jalai alun di Sarawak ngambi ejensi bekaul ulih ngaga analisis gaya penusah sereta ngaga strategi atur trafik ti nemban.
Kelimpah ari nya, raban bekuasa lokal mega mantaika isu jalai sekut ba menua sida empu nyengkaum pemansang mitigasyen sereta projek dikemendar di baruh Langgur Pemansang Malaysia Lumpar Ke13 (RMK-13).
Iya nyemetak madah, atur trafik mengeri ti nemban beguna endar ukai semina nambah pengelantang mensia mayuh mindah, tang nentuka operasyen mengeri lanchar sereta nyukung ekonomi nengeri tumbuh.
“Inisiatif mutar penanggul trafik mengeri begunaka kerejasama rat entara ejensi perintah enggau raban bisi kaul besai nengah pengawa negap penerit adat, nangkir jalai, ngaga jalai alternatif, ngaga sistem lampu trafik, nambah sistem pengangkut mensia mayuh, ngadu entepan entukar enggau nambah penemu pasal pengelikun ba jalai ngagai rayat,” ku iya. – EDISI UKAS
